Miliona euro për humbjet e energjisë në rrjet – OSHEE shpenzon 10 milionë euro vetëm për humbjet e javës së fundit të janarit 

Humbjet e energjisë ne rrjetin e shpërndarjes i kushtojnë shqiptarëve miliona euro. Ndërkohë që, Operatorit i Shpërndarjes së Energjisë Elektrike ka shpenzuar rreth 10 mln euro për mbulimin e humbjeve për periudhën 23 – 31 janar të këtij viti. Përfaqësues të këtij dikasteri, bëjnë me dije për TV SCAN se në këtë periudhë të vitit humbjet janë rritur edhe për shkak të rënies së prodhimit nga hidrocentralet, si pasojë e ngricave.

Shpenzimet konkrete për mbulimin e humbjeve në rrjetin e shpërndarjes dolën në pah, pas vendimit të qeverisë, që u miratuar në datën 21 dhjetor 2021, që i hoqi të drejtën Furnizuesit të  Tregut të Lirë, që është një prej kompanive të OSHEE Gropu, për të blerë energji, me qëllim plotësimin e nevojave konsumatore. Blerjet për këtë të fundit aktualisht kryhen nga Korporata Elektroenergjetike Shqiptare, ndërkohë që OSHEE  prokuron vetëm për mbulimin e humbjeve në rrjet, si dhe për furnizimin e klientëve në tregun e parregulluar që kanë zgjedhur këtë kompani, si furnizues të tyre.

Sipas të dhënave nga Enti Rregullator i Energjisë, për vitin 2020, 21.48% e energjisë humbiste në rrjet, ndërsa për 9-mujorin e vitit 2021, 20.94%. Reduktimi i humbjeve në rrjet kërkon investime serioze, ndërkohë që aktualisht përmes vendimit për shpalljen e gjendjes së emergjencës, qeveria ka urdhëruar kompanitë publike të pezullojnë investimet deri në muajin prill.

Ndërkaq, pak kohë më parë Qeveria miratoi rishikimin e planit për reduktimin e humbjeve në planin e konsolidimit financiar të sektorit elektorenergjetik, të përcaktuar në kredinë e marrë gjatë vitit 2014 nga Banka Evropiane për Rindërtim dhe Zhvillim, duke përcaktuar se niveli i humbjeve të energjisë elektrike në rrjetin duhet të reduktohet, ndërkohë që deri në vitin 2026 ky tregues duhet të arrijë në 17.8%. Sipas treguesve të rinj, për vitin 2021 humbjet e energjisë në rrjet duhet të rezultojnë në 20.5%, ndërsa në vitin që vjen 19.6%, duke arritur në 17.8% në vitin 2026.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.