Miliona euro për humbjet në rrjet – Fatura për mbulimin e energjisë që humbet, 288 milionë euro në vit 

Mbulimi i humbjeve në rrjetin e shpërndarjes së energjisë elektrike kërkon çdo viti miliona euro nga buxheti i Operatorit të Shpërndarjes së Energjisë Elektrike, ndërkohë që pavarësisht se janë bërë investime për reduktimin e tyre, fatura vijon të mbetet e kripur. Sipas të dhënave zyrtare, aktualisht mbulimi i vetëm 1% humbje, me një çmim mesatar importi prej 60 euro/Mwh, kushton 12 mln euro në vit.

Ndërkohë që, nëse përllogarisim faktin që për vitin që shkoi niveli i humbjeve u regjistrua në rreth 24%, do të thotë se vetëm për vitin 2018 janë shpenzuar 288 mln euro për mbulimin e tyre. Por, viti që lamë pas ishte më i miri në drejtim të këtij treguesi, duke qenë se u regjistruan një ulje rekord në krahasim me vitet e kaluar, çka do të thotë se në vite janë shpenzuar miliona euro për mbulimin e tyre.  Megjithatë, pavarësisht përmirësimit të këtij treguesi, ai vijon të mbetet shumë i lartë, edhe në krahasim me vendet e rajonit.

Për përmirësimin e  humbjeve në rrjet nevojitet investime të mëdha, ku ulja me 1% e tyre kërkon 50 mln euro. Ndërkohë që, synimi është që deri në vitin 2022 ky tregues të ulet në 15%, pra me 9 % më pak në raport me treguesit aktualë.

Ecuria e nivelit të humbjeve në rrjet:

2013 45.04%

2014 37.81%

2015 31.34%

2016 28.04%

2017 26.41%

2018 23.96%

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.