Milionat e minierave – 10 kompaninë që dominojnë tregun, kryeson Alb Mine me 178.7 mln USD
Pavarësisht se shifrat zyrtare tregojnë një trend në rënie të prodhimit të mineraleve, të dhënat e fundit të disponueshme tregojnë se kompanitë që zotërojnë leje minerare realizuan rreth 462 milion USD të ardhura për vitin 2016.
Sektori privat operon me 600 leje shfrytëzimi, kryesisht në rrethin e Bulqizës me 123 leje, Beratit me 44 leje dhe Kukësit me 42 leje. Por, cilat janë kompanitë që dominojnë tregun minerar në drejtim të të ardhurave që realizojnë dhe deklarojnë? Sipas të dhënave të përpunuara nga TV SCAN lista kryesohet nga Alb Mine & Chrome me plot 178.7 milion USD të ardhura, duke lënë shumë pas kompaninë e dytë në listë, që është Glejdis me rreth 7.2 milion USD.
Kompania e tretë që dominon tregun minerar është Brisel, me 6.4 milion USD të ardhura, ndërsa pas saj renditen Alb Ieaa dhe Egi-K me rreth 3.3 milion USD të ardhura të raportuara.
Pas këtyre kompanive renditen Alb Mi me rreth 3 milion USD dhe Illyria Minerals dhe Kid Alb 2.5 dhe 2.3 milion USD, duke u ndjekur nga Alb Canaj me 2.1 milion USD dhe Klosi me 2 milion USD të ardhura. Aktiviteti minerar në vend fokusohet kryesisht në nxjerrjen e mineraleve të kromit, bakrit, hekur-nikelit, zhavorrit dhe rërave bituminoze, gurit gëlqeror, etj. Kromi dhe ferrokromi zënë peshën kryesore të prodhimit minerar me rreth 74%, ndërsa materialet ndërtimore, kryesuar nga çimento përbëjnë nënsektorin e dytë me rreth 22%.
Megjithatë, prodhimit i mineraleve nuk është në ditët më të mira, ndërsa shkak për këtë situatë është mungesa e tregut të brendshëm dhe të jashtëm të shitjes si dhe çmimit të ulët në bursë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.