Milva Ekonomi në “Përballje”: Pse e ulëm në 6% TVSH për turizmin
Vendimi i qeverisë për uljen në masën 6 % të TVSH-së për turizmin, sipas ministres së Zhvillimit Ekonomik dhe Turizmit Milva Ekonomi është një vendim që vjen si vijim i mbështetjes për zhvillimin e sektorit në Shqipëri. E ftuar në emisionin “Përballje” të gazetarit Franko Egro, Ekonomi tha se niveli 6 % është përcaktuar nga Ministria e Financave në bazë të përllogaritjeve e në bazë të faktit se në rajon TVSH për këtë sektor varion nga 5-8 %.
“Në fakt është një betejë që strukturat akomoduese kanë kohë që e zhvillojnë. Kemi pasur takime të shpeshta me grupet e interesit dhe TVSH-ja ka qenë një tema e diskutuar vazhdimisht. Turizmi, kur merr pak zhvillim, ka nevojë për mbështetje e ulja e TVSH-së ka qenë një mbështetje për turizmin. Sipërmarrja turistike e ka rekomanduar si një nga gjërat që duhej të arrihej në këtë mandat. Ka qenë përpjekja e të gjitha palëve dhe u arrit të merrej ky vendim” tha Ekonomi.
Ndërsa kreu i shoqatës së Hotelerisë Zak Topuzi e ka konsideruar vendimin për uljen e TVSH-së si “lajmin më sensacional” që industria turistike priste. Sa i përket efekteve të vendimit, krahas rritjes së cilësisë dhe punësimit, sipas Topuzit, pritet që të ketë një ulje të çmimit të strukturave akomoduese por edhe një nisje të ndërtimit të resorteve që i mungojnë vendit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.