“Mini” i ri elektrik – BMW do nisë prodhimin këtë vit në Britani
Kompania gjermane e makinave, BMW, do të nisë prodhimin e modelit të ri elektrik Mini në fabrikën britanike në fund të 2019-ës. Sipas prodhuesit gjerman, makina e parë do të jetë e disponueshme për konsumatorët në fillim të vitit të ardhshëm. BMW prodhoi mbi 230,000 makina në fabrikën në jug të Anglisë vitin e kaluar, që është sa 15% i totalit të prodhimit të makinave në Britani.
Nxjerrja në treg e modelit të ri Mini mund të vijë paralelisht me daljen e Britanisë nga Bashkimi Europian. Nëse kjo ndodh pa marrëveshje, mund të sjellë tarifa dhe ndërprerje të prodhimit. Industria e makinave, që ka pësuar rënie të shitjeve, prodhimit dhe investimeve që prej vitit 2017, mund të përballet me tarifa në 10% dhe kosto shtesë nëse Britania del pa marrëveshje. BMW lajmëroi se do të zhvendosë një pjesë të prodhimit të motorëve jashtë Britanisë për shkak të Brexit.
Mbështetësit e Brexit kanë thënë prej kohësh se Gjermania, që eksporton qindra mijëra makina në Britani çdo vit, do të bëjë të pamundurën për të mbrojtur këtë marrëdhënie tregtare.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.