Ministrat e transportit të Ballkanit Perëndimor takohen në Slloveni – Gjiknuri: Prioritet, siguria rrugore dhe kalimi kufitar

Ministri i Infrastrukturës dhe Energjisë, Damian Gjiknuri ka prezantuar projektet e qeverisë shqiptare mbi sigurinë rrugore dhe ato mbi zhvillimet e infrastrukturës gjatë takimit të ministrave të transportit të vendeve të Ballkanit Perëndimor.

Takimi i iniciuar nga Komisinerja Europiane për Transportin Violeta Bulc, u mbajt në Ljubjanë të Sllovenisë, ku morën pjesë edhe përfaqësues nga Turqia si dhe nga vende të anëtare të Bashkimit Europian si Italia, Sllovenia, Kroacia, Greqia, Rumania dhe Qipro.

“Rasti i Shqipërisë me vendet fqinje u mbajt si model i mirë në këtë drejtim. Mu dha rasti të prezantoj projektet e qeverisë shqiptare për sa i përket sigurisë rrugore por mbi të gjitha edhe projektet e zhvillimeve në infrastrukturë. Shpjegova edhe skemat e mbështetjes financiare nëpërmjet Partnerit Publik Privat si një nga format e përmirësimit të infrastrukturës në vend, çka u përmend edhe nga komisionerja. Gjithashtu, u fol edhe për një fond të Bashkimit Europian, që e mori përsipër komisionerja, për ta adresuar të gjitha ‘hot spot-et’, ato që quhen vende të rrezikshme, të gjitha nyjet e identifikuara të transportit në Evropën Juglindore”, shtoi më tej Gjiknuri.

Sipas ministrit Gjiknuri, prezenca e përfaqësuesve të vendeve të Bashkimit Europian tregon edhe rritjen e interesit të tyre në këtë proces.

“Kjo tregon rritjen e interesit për këtë proces ashtu sikurse për përfshirjen e vendeve të tjera në ato që quhen korridore të rëndësishme europiane”, tha Gjiknuri.

Ndërkohë, në mbyllje të takimit ministrat ranë dakord edhe për dy deklarata që synonin angazhimin e përbashkët në rritjen e sigurisë rrugore dhe në lehtësimin e kalimit kufitar.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.