Ministri Çuçi hedh rasatet e parë të koranit në Liqenin e Ohrit: Vitin tjetër ndërtojmë molet për peshkatarët
Në nisje të procesit të hedhjes së rasatës së koranit në liqenin e Ohrit, ishte prezent ministri i Bujqësisë dhe Zhvillimit Rural, Bledi Çuçi, i shoqëruar nga zv.ministri Roland Kristo dhe kryebashkiaku Ilir Xhakolli. Për herë të parë këtë vit do të hidhen mbi 1.5 milion rasate, numri më i madh i prodhuar ndonjëherë në Shqipëri, ka njoftuar ministria.
“Ne aktualisht kemi një qendër moderne të rritjes së rasatit që kontribuon në mënyrë shumë të rëndësishme në kultivimin e koranit, si peshku unik që rritet vetëm në Liqenin e Ohrit”, tha ministri Çuçi teksa bashkë me peshkatarët hodhi në ujërat e liqenit rasatin e parë të koranit.
Sipas tij, kjo është e vetmja mënyrë për të ruajtur këtë pasuri jo vetëm tonën, por të të gjithë botës pasi siç dihet ky liqen është futur këtë vit edhe në mbrojtjen e UNESCO-s.
Më tej ministri Çuçi foli për investimet që do të kryhen në këtë liqen, për të lehtësuar aktivitetin e peshkatarëve. “Bashkë me kryetarin e bashkisë ramë dakord që së bashku të krijojmë qendrën e organizatës së peshkimit dhe të kontribuojmë për ndërtimin e disa moleve në funksion të peshkimit. Besoj se vitin tjetër do t’i kemi gati këto mole. Kjo do të krijojë një lehtësi shumë të madhe për peshkatarët”, tha ministri Çuçi.
Procesi i hedhjes së rasatit të koranit do të vijojë përgjatë gjithë muajit tetor. Ripopullimi me rasate të koranit, të kësaj specieje endemike të liqenit të Ohrit, është një mbështetje e qeverisë shqiptare për peshkimin në Pogradec si dhe mbrojtjes së biodiversitetit. Prodhimi i rasatit bëhet në qendrën moderne të rritjes pranë fshatit Lin, shkruhet në njoftim.
E.S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.