Ministri i Financave jep lajmin për individët dhe bizneset: Nga 1 tetori, 100 vertetime e leje më pak! Thjeshtohen procedurat për tatimpaguesit
Pas pak ditësh, qytetarët dhe bizneset nuk do të duhet të paraqiten më te institucionet publike për të marrë disa vërtetime, leje, licenca apo autorizime që ofrohen aktualisht. Janë 100 dokumente për të cilat duke nisur nga muaji tetor, tatimpaguesit nuk do të duhet t’i tërheqin ato nga sportelet publike të institucioneve. Ky fakt u bë i ditur nga ministri i Financave dhe Ekonomisë Arben Ahmetaj në emisionin “Top Story” të Sokol Ballës.
“Në tetor do të lancojmë fushatë e derregullimit, thjeshtimit të mëtejshëm të procedurave në favor të qytetarëve dhe sipërmarrjes.
Një shembull të thjeshtë. Kam kërkuar nga institucionet e varësisë se sa letra nga e gjithë gama e letrave që japim ne për tatimpagues dhe sipërmarrës janë në këndvështrimin tonë, të tepërta. Dhe me një analizë të shpejtë rezulton se janë 100 vertetime që mund të bien që me 1 tetor” tha Ahmetaj.
Ndërsa përkufizoi prioritetet e këtij mandati qeverisës, për fushën e ekonomisë, Ahmetaj tha se ky mandate do të jetë së pari mandati thjeshtimit të shërbimeve ndaj qytetarëve, së dyti mandate i luftës kundër informalitetit dhe së treti mandati i infrastrukturës.
Sa i përket marrëdhënies së re me Fondin Monetar Ndërkombëtar, ministri Ahmetaj tha se këtë herë bashkëpunimi do të jetë i një karakteri tjetër.
“Ne nuk kemi nevojë për para nga FMN por per këshillën e saj. Kur të jep para, na detyron.Mund të jetë marrëveshje gjysëm-detyruese.Pra ne do të mbajmë artikullin 4 ku FMN ka rol këshillues por për disa reforma do mundohem si ministër që marrëveshja të jetë detyruese” tha Ahmetaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.