Ministria e Brendshme vendos “rend” për aplikimet për karta identiteti: Fasha kohore për 3 muajt e ardhshëm!
Për t’u ardhur në ndihmë qytetarëve që u skadojnë dokumentet brenda këtij viti, Ministria e Brendshme njofton se është përcaktuar një radhë për aplikimet, duke lejuar të aplikojnë brenda muajit tetor vetëm shtetasit që kanë marrë dokumentet në fashën kohore Janar – Prill 2009; në muajin Nëntor ata që kanë marrë dokumentet në muajt Maj – Gusht 2009 dhe pjesa tjetër në Dhjetor.
Kjo ndarje, sipas zëvëndëministres së Brendshme Rovena Voda, duhet respektuar pasi përndryshe, shtetasit që kapërcejnë afatet, do të mund të aplikojnë vetëm në janar 2020.
“Kemi menduar, në mënyrë që të rregullojmë fluksin, – i cili patjetër në muajin dhjetor do të jetë i lartë, pasi kemi përveç kartave të identitetit edhe pasaportat biometrike, – të bëjmë një ndarje në fasha të qytetarëve për aplikim.
Do të thotë u bëj thirrje qytetarëve, të cilëve u skadon karta në periudhën janar-prill, të vijnë të aplikojnë brenda muajit tetor. Qytetarët nga maji deri në gusht duhet të aplikojnë në muajin nëntor dhe, nga shtatori deri në dhjetor, do të aplikojnë në muajin dhjetor.
Këtë ndarje në fasha ne e kemi bërë që të shmangim fluksin, që qytetarët të marrin shërbimin në kohë. Por më lejoni të them, ju lutem zbatojeni këtë rregull që ne kemi vënë për të pasur ju një shërbim më të mirë, por edhe të mos penalizoheni se më pas do të duhet të prisni muajin janar për të aplikuar për të marrë dokumentin e identifikimit,” tha Zv.ministrja Voda.
Kartat ID të prodhuara në muajt JANAR, SHKURT, MARS, PRILL 2009
-Aplikimi deri në 31 Tetor 2019
Kartat ID të prodhuara në muajt MAJ, QERSHOR, KORRIK, GUSHT 2009
-Aplikimi deri në 30 Nëntor 2019
Kartat ID të prodhuara në muajt SHTATOR, TETOR, NËNTOR, DHJETOR 2009
-Aplikimi deri në 31 Dhjetor 2019
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.