Ministria e Bujqësisë: Nuk ka grip të shpendëve në vend. Konfirmimi pas analizave të ISUV
Në Qarkun e Fierit nuk ka asnjë rast të pranisë së gripit të shpendëve, ndërkohë janë ndërmarrë të gjitha masat për të verifikuar situatën. Lajmi është komunikuar nga Ministria e Bujqësisë, ku në një deklaratë për mediat theksohet se në vendin tonë nuk ka asnjë rast të pranisë së Virusit Aviar.
“Specialistë nga Shërbimi Veterinar në Fier kanë shkuar në fshatrat ku ka pasur dëmtime dhe kanë marrë mostra të shpendëve të ngordhur dhe të gjallë dhe janë dërguar për analiza pranë Institutit të Sigurisë Ushqimore dhe Veterinarisë. Në sajë të përgjigjeve të raport-analizave nga ISUV, në asnjë prej mostrave, nuk ka rezultuar prani e virusit H5N8, apo siç quhet ndryshe, Gripi i Shpendëve. Ndërkohë, po sipas analizave, pulat e ngordhura në fshatrat e Fierit, kanë pasur infeksione të tjera. Në këto kushte, Ministria e Bujqësisë sqaron opinionin publik, se nuk ka asnjë rast për të pasur panik dhe se virusi i gripit të shpendëve nuk është identifikuar në vendin tonë”, thuhet në njoftim.
Në të njëjtën kohë, Ministria e Bujqësisë njofton se janë marrë masa të menjëhershme edhe për sasinë prej 66.300 shpendësh (zogj), të cilat u lejuan të importohen në vendin tonë, në kundërshtim me urdhrin e Ministrit Panariti.
“Përpos shkarkimit të sotëm të Inspektores së PIK nga Autoriteti Kombëtar i Ushqimit, Shërbimi Veterinar në Shkodër ka shkuar në stabilimentin e importimit të shpendëve dhe ka kryer dezinfektimin e të gjithë zogjve, ndërsa sasia e ardhur nga Austria dhe e kaluar transit nëpërmjet Malit të Zi, është futur në karantinë për 21 ditë dhe do të mbahet në mbikëqyrje në lidhje me shfaqjen e ndonjë sëmundjeje të mundshme”, vijon më tej njoftimi.
Ministri i Bujqësisë, Panariti, më 23 Nëntor 2016, ka urdhëruar ndalim e importit të shpendëve të gjallë nga vendet e prekura në virusi H5N8, si dhe kalimin e tyre transit në këto shtete, edhe nëse vendi i tyre i origjinës është i pastër. Masat e menjëhershme u morën për të minimizuar mundësitë e futjes së këtij virusi në vendin tonë, ndërkohë që shumë vende si Austria, Kroacia, Danimarka, Gjermania, Hungaria, Polonia, Rusia, Zvicra, Holanda, Mali i Zi, Bullgaria dhe Greqia kanë raportuar ngordhje në zogjtë e egër, për shkak te virusit H5N8. Ndërkohë, Ministri Panariti thirri në një takim dhe kompanitë e mbarështimit të shpendëve, të cilëve iu kërkoi masa rigoroze për parandalimin e përhapjes së virusit në pularitë tona, nëse ai mbërrin në Shqipëri.
Influenca aviare e njohur gjithashtu si “Gripi i shpendëve” shkaktohet nga virusi i influencës “Tipi A”, i cili mund të prekë disa specie (pulat, gjelat, pulat afrikane, shkurtat etj), si dhe shpendë shtëpiake e të egër. Virusi është izoluar gjithashtu nga disa gjitarë, duke përfshirë njerëzit, minjtë, macet dhe qentë.
Osman Dedja/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.