Ministria e Financave hedh për konsultim publik projektligjin për mbështetjen e startup-eve. Çfarë parashikon drafti

Ministria e Financave ka hedhur për konsultim publik projektligjin “Për mbështetjen dhe zhvillimin e Startup-eve Inovative”, drafti i të cilit parashikon krijimin e një kuadri rregullator dhe institucional për ekosistemin e startup-eve në Shqipëri.

Drafti parashikon përjashtim nga pagesa e taksave vendore si tatimi i thjeshtuar mbi fitimin për biznesin e vogël, taksën vendore mbi pasurinë e paluajtshme, si dhe taksa vendore e tabelës. Kjo, për ato startup-e të certifikuara dhe të regjistruara në regjistrin tregtar. Po ashtu, gjatë periudhës së inkubimit përfitojnë grante financiare apo programe dhe masa mbështetëse.

Nga ana tjetër, ndër masat mbështetëse të draftit për të gjithë iniciatorët e rinj të paregjistruar në regjistrin tregtar, është shërbimi i konsulencës falas; inkubim, mentorim dhe mbështetje të projekt – idesë nga lehtësuesit e certifikuar.

Sa i takon shkeljes së dispozitave, sanksionet dhe masat administrative të draftit vijojnë si më poshtë:

• Mos raportimi periodik sipas parashikimeve ligjore dhe marrëveshjes së zbatimit, me vlerë 50,000 lekë;
• Mos zbatimi i projekt – idesë së certifikuar sipas parashikimeve ligjore dhe marrëveshjes së zbatimit, me vlerë 20,000 lekë.

• Në rast të shkeljeve të parashikuara sipas pikës 2 të këtij neni, Bordi i Vlerësimit të Startup-eve Inovative vendos pezullimin e përkohshëm dhe ndërprerjen e përfitimit të masave mbështetëse, deri në përmbushjen e saktë të detyrimeve.
• Ndryshimi thelbësor i plan biznesit pa miratimin e Bordit të Vlerësimit të Startup-eve Inovative, me vlerë 500,000 lekë;

• Paraqitja e informacioneve të rreme përgjatë aplikimit dhe periudhës së monitorimit, me vlerë 1,000,000 lekë;

• Shkelja e dispozitave ligjore mbi të drejtën e autorit, pronësinë intelektuale dhe industriale, me vlerë 1,000,000 lekë;

• Shpërdorimi apo keqpërdorimi i fondeve, në ndryshim nga plan biznesi i miratuar, me vlerë 1,000,000 lekë;

• Shpërndarja e dividendit, shpërblimeve apo formave të tjera të fitimit, përgjatë periudhës së inkubimit, nëse përfiton masa mbështetëse, në kundërshtim me dispozitat e këtij ligji, me vlerë 1,000,000 lekë.

 Projektligji synon të plotësojë boshllëkun ligjor ekzistues, pasi Shqipëria deri më tani, nuk ka pasur dispozita të cilat rregullonin situatat e lidhura me Startup-et inovative.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.