Ministrja Denaj në Samitin e Poznan: Bashkëpunimi rajonal rrit tërheqjen e investimeve të huaja!
Ministrja e Financave dhe Ekonomisë, Anila Denaj, po merr pjesë në Samitin e Ballkanit Perëndimor për vitin 2019, në Poznan të Polonisë.
Ministrja Denaj foli për arritjet e Shqipërisë në fushën e ekonomisë, kryesisht në tërheqjen e investimeve të huaja direkte.
“ Investimet e huaja direkte arritën shifrën e 285 milionë eurove, më të larta se e njëjta periudhë e vitit të kaluar” u shpreh Denaj.
Gjatë këtij takimi të ministrave të Ekonomisë u diskutua mbi klimën e të bërit biznes, si dhe iu bë një pasqyrë e programit shumëvjeçar të akteve ekonomike në rajon.
Sipas Ministres, janë katër aspekte që meritojnë vëmendje dhe shikohen si perspektiva të zhvillimit.
“Është tregtia, investimet, është zhvillimi digjital ose ekonomia digjitale dhe jo më pak, por shumë e rëndësishme infrastruktura fizike, por jo vetëm e konsideruar në rrugë, por edhe infrastruktura sidomos e energjisë dhe e energjisë së pastër. Shumë investitorë janë duke folur sot për energjinë e rinovueshme dhe shndërrimin e qyteteve tona në ‘Qytete të Gjelbra” nënvizoi Ministrja.
Denaj theksoi faktin se i gjithë Ballkani Perëndimor arriti në 1 Korrik marrëveshjen për të anonçuar “Roaming Zero”, i cili është një hap për t’ju bashkuar tregjeve të botës digjitale.
“Besojmë që vizioni i përbashkët i vendeve të Ballkanit Perëndimor drejt zhvillimeve ekonomike dhe infrastrukturës do sjellin investitorë të huaj për të gjithë rajonin dhe jo vetëm për vende të veçanta specifikisht” theksoi Ministrja e Financave dhe Ekonomisë.
Denaj tha se ka një bashkëpunim mes gjithë vendeve të Ballkanit, ku ka një unifikim të vizionit, kjo edhe në kuadër të CEFTA-s, e cila këtë vit kryesohet nga Shqipëria.
Samiti i këtij viti është i 6-ti që zhvillohet, dhe veç vendeve të rajonit, anëtare të procesit të Berlinit janë edhe Gjermania, Franca, Italia apo edhe Austria e Mbretëria e Bashkuar.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.