Implementimi i projektit të ri/ Ministrja Denaj vizitë në Zyrën e Punës, Elbasan: “Përmirësojmë shërbimin dhe infrastrukturën për biznesin”

Ministrja e Financave dhe Ekonomisë, Anila Denaj ka zhvilluar në ditën e sotme një takim së bashku me kryetarin e Bashkisë së qytetit, z.Gledian Llatja dhe Zëvendëskreun e Misionit të Ambasadës së Zvicrës, në Shqipëri, z.Patrik Meier.

Vizitë u krye në ambientet e Zyrës së Punës të Elbasanit, në kuadër të projektit të ri “Risi Albania”, me ndihmën e Agjencisë Zvicerane për Zhvillim dhe Bashkëpunim,  për të parë në praktikë zbatimin e metodikës për Analizën e Tregut të Punës dhe Bashkëpunimit me Biznesin.

Kjo metodikë e re ka për qëllim kryesor t’i  transformojë të gjitha Zyrat e Punës në Shqipëri në institucione më funksionale në ndërlidhjen që ato duhet të kryejnë me biznesin,  duke u kthyer në katalizator të punësimit dhe formimit profesional të qytetarëve, sidomos në kohën e pandemisë.

“Ne jemi në shërbim të biznesit dhe gjithë përpjekja gjatë 7 viteve të qeverisjes ka qenë të përmirësojmë më tej këto shërbime, jo vetëm në aspektin e një infrastrukture të përshtatshme, por mbi të gjitha të metodologjive, kurrikulave që do të ndërlidhin si arsimin profesional, qendrat e formimit profesional, ashtu edhe shërbimin në zyrat e punës në përshtatshmëri të plotë me kërkesat dhe nevojat e bizneseve”, u shpreh Ministrja Denaj.

Drejtoresha e Agjencisë Kombëtare të Punësimit dhe Aftësive (AKPA), znj.Elira Demiraj është shprehur se volumi i njerëzve ka qenë në rritje dhe se Zyra e Punës duke ndihmuar njerëzit të gjejnë vende pune, jep kështu edhe një dritare shprese se ekonomia po vitalizohet sërish.

Ndërkohë, nga të dhënat e publikuara nga Ministria e Financave dhe Ekonomisë që prej fillimit të pilotimit, në zonën e Elbasanit është arritur:

-Punësimi i 281 punëkërkuesve të papunë;

-187 bizneseve u janë ofruar shërbime të përmirësuar

-12 anëtarë të personelit të Zyrës së Punës Elbasan janë trajnuar për aplikimin e saj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.