Ministrja Ekonomi në Universitetin e Durrësit: Fondet për mbështetjen e sipërmarrësve të rinj  

“Gjatë viteve 2017-2021, në mbështetje të bizneseve nga AIDA do te vazhdoje disbursimi i fondeve Start-Up në vlerë prej 50 milionë lekë, dhe fondi për mbështetjen e ekonomisë kreative kryesisht Artizanati në vlerë prej 50 milion lekë. Nga këto dy fonde do të përfitojnë mbi 200 sipërmarrës të rinj. Gjatë 2015- 2016, rreth 44 ide biznesi nga të rinjtë u mbështetën nga Fondi Start up, që jepet nga AIDA, ose me 14 milionë lekë”.

Kështu është shprehur ministrja Ekonomi në Durrës, gjatë një leksioni të hapur në Universitetin “Aleksandër Moisiu” me temë “Sipërmarrja, risi dhe sfida”, ku ndër të tjera shtoi se nisur nga ecuria pozitive e zhvillimit te sektorit te turizmit, tek AIDA me fillimin e vitit 2017 do të gjejë zbatim fondi mbështetës për sipërmarrësit e rinj që operojnë në sektorin e turizmit, i cili do jetë një fond grant në vlerë prej 10 milionë lekësh.

Në prani të dhjetëra studentëve të ekonomisë, ministrja Ekonomi shpjegoi fillimisht situatën ekonomike në Shqipëri duke ua bërë të shpjegueshme faktet studentëve, situatën optimiste që ekonomia shqiptare po kalon.

 “Ekonomia e vendit tonë gjatë kësaj periudhe qeverisjeje është rritur nga viti në vit, tha ministrja Ekonomi, duke kujtuar se në vitin 2016 rritja ekonomike vlerësohet  3.4% të Prodhimit të Brendshëm Bruto, ndërsa objektivi i qeverisë  për vitin 2017 është 3.7%, objektiv ambicioz në favor të qytetarëve. Edhe për sa i përket punësimit, indikatorët janë pozitivë, shpjegoi Ekonomi duke theksuar se shkalla e papunësisë ka ndjekur një trend rënës nga 17.5% në 2014 në 14.2% në tremujorin e fundit te 2016.” 

Ajo i ftoi studentët e Ekonomisë të ballafaqohen vazhdimisht me statistikat e INSTAT, të Bankës së Shqipërisë dhe të indikatorëve të tjerë të rëndësishëm globalë; si Eurostat, OECD, OKB.

“Që të ecë ekonomia, duhet patjetër që të lehtësohet klima e të bërit biznes, dhe për këtë kujdeset qeveria, e cila falë reformave të saj ka bërë të mundur të lehtësojë shumë procedura për ecurinë e biznesit; duke filluar që nga momenti i regjistrimit, marrja e një licence dhe shumë procese të tjera, shumica e të cilave tashmë bëhen online. Indikatori më i mirë për të informuar mbi klimën e biznesit ishte raporti ‘Doing Business” ku Shqipëria për herë të parë është renditur në pozicion historik në vendin e 58  nga 190 vende të analizuara. Ndërkohë janë dhe tregues të tjerë si Indeksi i Konkurrueshmerisë Globale 2016-2017, ku Shqipëria pati pozicionim në vendin e 80 nga 138 vende”, theksoi Ekonomi.

Gjithashtu ministrja u tregoi studentëve që investimet e huaja direkte në Shqipëri janë rritur, dhe dy vitet e fundit 2015 dhe 2016 ato përllogariten rreth 9% të PBB. “Kemi parë investime të rëndësishme në disa sektorë që janë sektorë potencialë: energjia dhe telekomunikacioni. Jo vetëm vlera investimeve është rritur por edhe prezenca e kompanive që operojnë në Shqipëri. Në 2016 janë regjistruar 1,503 kompani ose 25% më shumë se në vitin 2015”, theksoi Ekonomi.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.