Ministrja Financave dhe Tatimet në terren: “38 mijë të papunë nga pandemia. Paga e luftës kalon automatikisht pas 5 qershorit.”
Ministrja e Financave dhe Ekonomisë, Anila Denaj dhe Drejtorja e Përgjithshme e Tatimeve, Delina Ibrahimaj kanë qenë në terren për të parë nga afër situatën financiare të bizneseve dhe respektimin e masave të përcaktuara nga autoritetet në krizën e COVID-19.
Sipas tyre, aktualisht janë 64 964 individë, të cilët kanë përfituar “pagën e luftës” nga paketa e parë dhe 109 664 të tjerë kanë përfituar 40.000 lekë nga paketa e zgjeruar.
Ministrja Denaj siguroi bizneset se të gjitha prej tyre pritet do të kthehen në normalitet, ndërsa deri në fund të qershorit do të dëmshpërblehen:
“Hapja e bizneseve do të jetë çështje kohe, duke siguruar ato protokollet që kemi thënë si dezinfektuesit, që tani do të bëhet mënyrë jetese. Ju deri në fund të qershorit jeni të garantuar, pasi edhe pagën e qershorit e paguajmë ne për ju”, tha ministrja Denaj.
Drejtoresha e Përgjithshme e Tatimeve, Delina Ibrahimaj theksoi se për periudhën mars- prill rreth 38 mijë persona humbën punën për shkak të pandemisë.
Gjithashtu drejtuesja u shpreh se pas 5 qershorit paga e luftës do të kalojë automatikisht për ata që nuk kanë aplikuar, për të arritur objektivin e qeverisë, që paga të mbulojë 176 mijë individë:
“Ne kemi ndjekur me shumë kujdes procesin e ankesave, të ardhura nga individët apo nga tatimpaguesit, të cilët nuk kanë mundur të aplikojnë apo të përfitojnë nga paketa e dytë. Ne u bëmë më dije me numrin total të të larguarve nga puna për periudhën mars-prill, i cili është rreth 38 mijë individë, dhe kemi bërë të mundur që këta individë që “defakto” janë larguar nga puna të përfitojnë nga paga e luftës. Që nga momenti i miratimit, tatimet do të afishojnë në faqen e vet të gjithë tatimpaguesit që do të jenë përfitues të këtij ndryshimi, por edhe individët që do të jenë përfitues, të cilat do të kenë kohë deri në 5 qershor të aplikojnë. Nëse bizneset nuk do të aplikojnë, ne pagën e luftës do t’ua kalojmë automatikisht të gjithë individëve që duhet të përfitojnë nga kjo pagë, dhe do të përfitojnë nga paga e luftës duke arritur vlerën 176 mijë persona”, tha ajo.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.