Ministrja gjermane e Europës bën vizitën e parë në Shqipëri – Në qendër të bisedimeve integrimi në BE!

Ministrja gjermane e Europës, Anna Lührmann, do të vizitojë për herë të parë Maqedoninë e Veriut dhe Shqipërinë siç bëhet e ditur nga një njoftim i ministrisë së jashtme gjermane, politikania e gjelbër do të takohet të hënën në Shkup me përfaqësues të shtetit si dhe të martën me kryeministrin Edi Rama dhe me zëvendësministren e jashtme, Megi Fino.

Në qendër të bisedimeve do të jetë integrimi i Maqedonisë së Veriut dhe Shqipërisë në rajon si edhe reformat e brendshme dhe në Tiranë, ministrja gjermane do të bisedojë edhe për rolin e Shqipërisë si anëtare e Këshillit të Sigurimit të OKB-së.

Lührmann mbetet kështu tërësisht në vijën e paraardhësit të saj, Michael Roth, dhe pritet të jetë avokate e fortë e rajonit në BE, por edhe të adresojë në biseda dypalëshe problemet e mundshme. Një nga çështjet që do të jetë temë e bisedimeve me shoqërinë civile në Tiranë është mbrojtja e klimës.

Maqedonia e Veriut dhe Shqipëria janë dy vendet e para, pas Francës në dhjetor, që ministrja gjermane e Europës i viziton që kur ka ardhur në detyrë në dhjetor të vitit të kaluar. Një dëshmi kjo, që qeveria e re mes të gjelbërve, socialdemokratëve dhe liberalëve, sikurse e ka shprehur dhe në marrëveshjen e koalicionit, e merr seriozisht perspektivën europiane të rajonit. Që në pjesëmarrjen e saj të parë në takimin e rregullt të Këshillit të Ministrave të Europës, që u mbajt në 14 dhjetor në Bruksel, Lührmann kërkoi fillimin e konferencave ndërqeveritare me dy vendet. DW

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.