“Miqtë” përjashtojnë Trump nga rrethi – Deutsche Bank dhe Shoqata e Golfit ndërpresin bashkëpunimin
Donald Trump ka filluar të “paguajë” për veprimet e tij. Sipas Nju Jork Times, Deutsche Bank nuk do të bëjë biznes me Trump apo ndonjë nga kompanitë e tij në të ardhmen. Banka gjermane është huadhënësja më e rëndësishme e Trump, me afro 340 milionë dollar hua të papaguara për “Organizata Trump”, grupi ombrellë i presidentit, që aktualisht mbikëqyret nga dy djemtë e tij.
Edhe në nëntor, Reuters njoftoi se Deutsche po kërkonte mënyra për t’i dhënë fund marrëdhënies së saj me Trump pas zgjedhjeve në SHBA, pasi është lodhur nga publiciteti negativ që buron nga ky bashkëpunim.
Nga ana tjetër, kryengritja e Kapitolit i ka kushtuar Trump- it në një tjetër fushë “të preferuar”. Shoqata Amerikane e Profesionistëve të Golfit ka deklaruar se nuk do të zhvillojë më kampionatin e vitit 2022 në Klubin Nacional të Trump për Golfin, njoftim ky i dhënë nga vetë presidenti i PGA- së në Amerikë, Jim Richerson.
“Bordi i Drejtorëve të PGA- së së Amerikës votoi për të ushtruar të drejtën për të përfunduar marrëveshjen, për të luajtur Kampionatin PGA 2022 në Trump Bedminster,” tha Richerson në një deklaratë me shkrim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.