Mira Pogaci në ‘Argumet’: ‘Bizneset janë larg planifikimeve të tyre përsa i përket fitimeve’
Mira Pogaci, Drejtore Ekzekutive në Shoqatën e “Bashkimit Tregtar të Shqipërisë”, ishte pjesë e panelit, në ‘Argument’ të hënën në mbrëmje, për të diskutuar rreth apelit që biznesi i bëri sot qeverisë për zgjidhjen e krizës politike në vend.
Pogaci ishte pjesë e këtij apeli, pasi sipas saj kishte ardhur momenti për një thirrje të tillë. Ajo thekson se shumë nga bizneset deklarojnë se janë larg planifikimit të tyre të fitimit dhe shprehin rezervat e tyre në lidhje me situatën në të cilëm ndodhet vendi.
‘’Biznesi është aktor i fuqishëm në vend por ndjehet i frikësuar nga gjendja në të cilën ndodhet, edhe pse 9 nga 10 të punësuar janë në biznesin privat. Deklaratat e politikës, si përgjigje të shqetësimeve tona, duken të shkëputura nga problemet e vërteta të biznesit dhe qytetarëve, pra praktikisht faktori politik është komplet indiferent kundrejt kësaj çështjeje.’’
Në lidhje me thirrjen që biznesi i bëri qeverisë, Pogaci thekson se pothuajse në 30 vite nuk ka ndodhur që biznesi të bëhet bashkë për një çështje politike dhe kjo është për t’u vlerësuar. Dhe deklarata e sotme erdhi pas situatës së rënduar në të cilën gjendet biznesi, ku vlera e tij në tregun shqiptar bie çdo ditë, në projektë, subjektë por dhe në ide. Sipas drejtores ekzekutive të Shoqatës së Bashkimit Tregtar të Shqipërisë, politika duhet të marrë shembull nga biznesi sesi bëhet një marrëveshje, për të gjetur zgjidhje.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.