Miratim i plotë për vaksinën Pfizer – FDA amerikane pritet të vendosë të hënën për t’i dhënë nxitje vaksinimit të sigurt
Administrata Amerikane e Ushqimit dhe Barnave synon të japë miratimin e plotë për vaksinën COVID-19 të Pfizer të hënën. Rregullatorët kërkonin të përfundonin procesin deri të Premten, por ende po punonin përmes “një sasie të konsiderueshme dokumentesh dhe negociatash me kompaninë”.
Miratimi mund të nxisë fushatën e vaksinimit duke bindur amerikanët e pavaksinuar se vaksina e Pfizer është e sigurt dhe efektive dhe gjithashtu do të qetësojë më shumë zyrtarët lokalë në zbatimin planeve të vaksinimit. Ushtria amerikane pritet të kërkojë që anëtarët e shërbimit të vaksinohen menjëherë pasi të jetë autorizuar plotësisht vaksina e Pfizer dhe punëdhënësit e tjerë të mëdhenj amerikanë të mund të ndjekin shembullin.
Hezitimi për t’u vaksinuar ka qenë një pengesë e madhe në synimin e Shtëpisë së Bardhë për të vaksinuar të gjithë amerikanët e rritur kundër koronavirusit. Vetëm rreth 60 përqind e të rriturve të moshës 18 vjeç e lart janë vaksinuar plotësisht edhe pse varianti i ri Delta i COVID-19 ka ndikuar në rritjen e rasteve.
Miratimi i plotë i vaksinës së Pfizer gjithashtu do ta bënte më të lehtë për mjekët që të përshkruajnë një dozë të tretë përforcuese. FDA ka autorizuar dozën e tretë Pfizer si një përforcues për njerëzit me sistem imunitar të dobët, por Shtëpia e Bardhë planifikon t’i ofrojë ato shumë më gjerësisht në muajt e ardhshëm. Disa ekspertë, përfshirë Organizatën Botërore të Shëndetit thonë se nuk ka ende të dhëna të mjaftueshme për kryerjen e një doze të tretë.
Vaksina e Pfizer u autorizua për përdorim emergjent në dhjetor 2020 dhe më shumë se 203 milionë persona në Shtetet e Bashkuara e kanë marrë atë deri më tani. Asnjë nga tre vaksinat e autorizuara COVID-19 nuk ka marrë miratimin e plotë të FDA-së.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.