Miratimi i pilulës anti Covid, një arritje! – Britania, dritën e gjelbër ilaçit të Merck. Do të “transformojë” luftën me pandeminë
Miratimi i pilulës antivirale të Covid-19 nga Britania, përbën një arritje në luftën kundër pandemisë, sipas analistëve. Saye Khoo, profesor i Departamentit të Farmakologjisë tek Universiteti i Liverpoolit, tha se ilaçi i ri, që administrohet nga goja, pritet të transformojë perspektivën e trajtimit të koronavirusit. Britania u bë vendi i parë në botë ditën e Enjte që miraton një pilulë antivirale ndaj Covid-19, që është zhvilluar nga firma amerikane Merck në bashkëpunim me Ridgeback Biotherapeutics. Rregullatori i barnave në Britani, e rekomandoi ilaçin, molnupiravir, për përdorim tek njerëzit me sëmundje të lehtë apo të moderuar, dhe të paktën një faktor rreziku të zhvillimit të sëmundjes së rëndë, si obezitet, moshë e madhe, diabet dhe sëmundje e zemrës. Ilaçi do administrohet sa më shpejtë të jetë e mundur pas testimit pozitiv me Covid dhe brenda 5 ditëve të shfaqjes së simptomave.
“Disponimi i një ilaçi si ky, një antiviral i fortë, që mund të merret thjeshtë nga goja, përbën një arritje në zbulimin e mjekimeve efektive kundër Covid. Bazuar në suksesin e madh që këto përbërje të vogla kanë patur tek HIV dhe Hepatiti C, ne kemi të gjithë pritshmëritë se ilaçi do trajtojë Covid shumë më mirë në vitin 2022 dhe përtej”, u shpreh Saye Khoo, Profesor i Farmaceutikës.
Miratimi është i pari për një trajtim antiviral në formë pilule për Covid dhe i pari për një ilaç që do admnistrohet gjerësisht në një komunitet. Ekspertët në SHBA do takohen këtë muaj pëër të votuar për autorizimin e molnupiravir. Lufta ndaj pandemisë është përqëndruar kryesisht tek vaksinat dhe opsione të tjera, përfshirë remdesivir që merret me infuzion në gjak dhe steroidi deksametazon, jepen përgjithësisht pasi pacienti është shtruar në spital. Molnupiravir është monitoruar me interes pasi të dhënat në Tetor nga provat klinike treguan se mund të përgjysmojë shanset e vdekjes apo shtrimit në spital, tek ata në rrezik të sëmundjes së ashpër. Molnupiravir, që do ketë emrin tregtar Lagevrio në Britani, paraqet gabime në kodin genetik të koronavirusit që shkakton Covid-19 dhe merret dy herë në ditë, për 5 ditë. Merck deklaroi se sekuencimi viral i bërë deri më tani ka treguar se molnupiravir është efektiv kundër të gjithë varianteve, përfshirë atij Delta.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.