Miratimi i Sputnik V në Evropë / Mund të vonohet prej mungesës së të dhënave klinike
Miratimi i vaksinës së koronavirusit Sputnik V në Bashkimin Europian mund të vonohet për shkak se afati i dorëzimit të të dhënave më 10 Qershor dështoi të arrihet. Sipas burimeve për Reuters, dështimi i ofrimit të të dhënave të nevojshme klinike tek mbikëqyrësi i barnave në BE, do të vonojë miratimin të paktën deri në Shtator. Agjencia Europiane e Barnave pritej të përfundonte vlerësimin e vaksinës ruse dhe të arrinte në një vendim në Maj apo Qershor. Nga ana tjetër, Fondi i Investimeve Direkte në Rusi (RDIF), që po financon vaksinën, theksoi se Agjencia Europiane e Barnave nuk do vonohet. “I gjithë informacioni mbi provat klinike të vaksinës Sputnik V është ofruar dhe rishikimi mbi Praktikat e Përgjithshme Klinike ka përfunduar me rezultate pozitive”- deklaroi fondi. Sipas zyrtarëve rus, ekipi i vaksinës pret që miratimi të ndodh në 2 muajt e ardhshëm. Qeveria e kancelares Angela Merkel ka zhvilluar bisedime për të blerë Sputnik V, por e ka lënë marrëveshjen e blerjes në varësi të miratimit nga Agjencia e Barnave. Sllovakia u bë vendi i dytë në BE pas Hungarisë që vaksinon njerëzit me Sputnik V këtë muaj, pavarësisht mungesës së një miratimi.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.