Miratimi i vaksinës së Oksfordit, Gove: “Do përshpejtonte heqjen e masave të karantinës”

Miratimi nga rregullatorët britanikë të vaksinës kandidat të Covid-19 që po zhvillohet nga Universiteti i Oksfordit në bashkëpunim me AstraZeneca, mund të përshpejtojë heqjen e masave të Covid-19, sipas ministrit të kabinetit, Michael Gove.

Ai tha në nisje të Javës se organi rregullator i pavarur ka nisur të vlerësojë vaksinën, por nëse injeksioni miratohet, do të ketë një rritje të ndjeshme të vaksinave në dispozicion.  Britania nisi e para shpërndarjen e vaksinës së zhvilluar nga Pfizer me BioNTech.

“Nëse marrim autorizim për atë vaksinë, dhe shpërndarja vazhdon sipas planit, atëherë do të mund të heqim në mënyrë progressive masat e karantinës, që kanë ndërprerë jetesën normale për të gjithë”- tha Michael Gove.   Vaksina e AstraZeneca ka një normë të efektshmërisë në 90%, sipas provave të fazës përfundimtare, në një regjim me gjysmë doze fillimisht, ndjekur nga një e plotë më vonë. Regjimi me gjysmë doze është ndërmarrë gabimisht në prova dhe ai me dy doza të plota, kishte një efektshmëri prej vetëm 62%.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.