Miratohet statusi i naftëtarit, përfitojnë të punësuarit dhe ata që kanë dalë në pension
Rreth 5 mijë persona pritet që të përfitojnë nga statusi i naftëtarit ndërkohë që 2 mijë të tjerë do të përfitojnë pension.
Në një dalje për median Ermonela Felaj, Ministre e Shtetit për Marrëdhëniet me Parlamentin, ka bërë të ditur vendimin e qeverisë për hyrjen në fuqi të statusit të naftëtarit.
Personat që përfitojnë statusin sipas përcaktimeve të këtij ligji pajisen me dëshmi zyrtare identifikuese, të përcaktuar nga komisioni i ngritur për këtë qëllim.
Paga minimale e personave me këtë status do të bëhet minimalisht sa 80 % e pagës minimale në rang vendi.
Punonjësit e industrisë së naftës dhe gazit që gëzojnë statusin e naftëtarit dhe që dalin në pension ose kanë dalë në pension, përfitojnë shtesë pensioni në masën 1 % për çdo vit pune por jo më shumë se 40 % të vlerës së pensionit të plotë të pleqërisë, të llogaritur apo aktual, për punonjësit që kanë jo më pak se 30 vjet punë për burrat dhe 25 vjet punë për gratë, në industrinë e naftës.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.