Miratohet vendimi për 2 paketat e reja shëndetësore që do të ofrohen falas

Qeveria ka miratuar dje vendimin për ofrimin e dy paketave të reja falas në spitalet publike dhe jo publike në të gjithë vendin. Të njoftuara më herët edhe nga Ministrja e Shëndetësisë dhe Mbrojtjes Sociale, Ogerta Manastirliu, paketat e reja përfshijnë:

“Paketa e trajtimit të kataraktës, sipas shtojcës 6, bashkëlidhur këtij vendimi;

Paketa e shërbimit të radioterapisë (me akselerator linear), sipas shtojcës 7, bashkëlidhur këtij vendimi.”

Fondi i Sigurimit të Detyrueshëm Shëndetësor do të mundësojë edhe shërbimet e këtyre paketave të reja, si dhe kostot e tyre.

Sipas ligjit nr. 10383, datë 24.2.2011, “Për sigurimin e detyrueshëm të kujdesit shëndetësor në Republikën e Shqipërisë”, FSDSH ofronte shërbimin dhe financimin e paketave të mëposhtme:

• Paketa e shërbimit të dializës
• Paketa e shërbimeve të kardiologjisë
• Paketa e shërbimeve të kardiokirurgjisë
• Paketa e shërbimit të transplantit të veshkës
• Paketa e shërbimit të implantit koklear

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.