Mirëmbajtja e lojrave të fatit – Tabaku: S’është bërë transparencë për kontratën, është monopol

Opozita vijon me akuzat ndaj qeverisë sa i përket lojërave të fatit. Në një dalje për mediat, deputetja e PD-së Jorida Tabaku ka thënë se nuk është bërë asnjëherë transparencë sa i përket kontratës koncesionare për mirëmbajtjen e pikave të basteve. Ndërkohë që është shkelur ligji duke e kthyer në monopol tregun për mirëmbajtjen e lojërave të fatit.

“Në shkelje të çdo ligji, kontrata e koncesionit nuk është bërë asnjëherë publike dhe Ministria e Financave vazhdon të fshehë sesa do ta rëndojë buxhetin ulja e taksave për bixhozin. Ajo që dihet deri tani është se me ligjin e vitit 2015, Edi Rama detyron pikat e basteve të bëjnë pagesën e mirëmbajtjes së sistemit jo në shtet, por tek kompania koncesionare. Kjo do të thotë se sa më shumë pika bastesh të operojnë në Shqipëri, aq më i madh është fitimi i kompanisë koncesionare që, zyrtarisht, operon në emër të ortakut të vëllait të kryeministrit. Kjo është arsyeja pse në treg, në vitin 2013 ishin 928 pika bastesh dhe 4 vjet pas ardhjes në pushtet të Edi Ramës, pikat e basteve janë katërfishuar, duke numëruar 4230 pika bastesh”, u shpreh Tabaku.

Në janar të 2019 kur të hyj në fuqi ligji i lojërave të fatit i cili është shtyrë që nga 2015, tatimi mbi fitimin i këtyre bizneseve nuk do të  jetë  25% por 15% .

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.