Mirëmbajtja e rrugëve gjatë dimrit – 500 mjete në terren, Balluku: Kapacitetet në gatishmëri për të përballuar situatën
Autoriteti Rrugor Shqiptar ka nisur zbatimin e planit të masave për mirëmbajtjen dimërore të akseve rrugore, për të garantuar qarkullimin pa probleme dhe të sigurt të automjeteve në të gjitha segmentet rrugore në vend gjatë stinës së dimrit. Ministrja e Infrastrukturës dhe Energjisë, Belinda Balluku ishte në Kukës për të ndjekur masat e marra, teksa kreu i Autoritetit Rrugor Shqiptar, Ergys Verdho bëri m dije skemën e mirëmbajtjes që ndahet mes Bankës Botërore dhe ARRSH-së.
“Autoriteti Rrugor Shqiptar e ka në fokus kryesor pjesën e mirëmbajtjes së akseve rrugore, ku mirëmbajtja është ndarë në dy pjesë. 1300 kilometra praktikisht është në kontratën e mirëmbajtjes me performancë të Bankës Botërore, ku ka katër kontrata që mbulojnë veriun, qendrën dhe jugun dhe pjesa tjetër e akseve rrugore, që janë 2400 kilometra, mirëmbahet nga Drejtoritë Rajonale në bashkëpunim me Autoritetin Rrugor Shqiptar”, bëri të ditur drejtori Verdho.
Ministrja e Infrastrukturës dhe Energjisë theksoi rëndësinë për të garantuar lëvizjen e lirë dhe mbi të gjitha të sigurt të automjeteve në të gjitha akset rrugore të vendit, pavarësisht kushteve të motit.
“Është shumë e rëndësishme dhe duhet theksuar që bashkëpunimi i Bashkisë me Autoritetin Rrugor Shqiptar është një pjesë shumë e rëndësishme, sidomos në zonat të cilat e kanë edhe problematikën e motit të përkeqësuar, siç është zona e Kukësit, Ersekës apo Korçës.
Sipas ministrisë, plani i masave përfshin angazhimin e afro 500 mjeteve, borëpastruese dhe mjetet të tjera të rënda, ndërsa janë rezervuar afro 5 mijë tonë kripë që do të hidhen në rrugë, për të eliminuar ngricat si dhe afro 1200 punonjës, të cilët janë në gatishmëri në të gjithë vendin. Që prej datës 15 nëntor janë ngritur shtabet e emergjencës në drejtoritë rajonale dhe atë qendrore ku raportohet gjatë 24 orëve lidhur me problematikat dhe situatën në akset rrugore.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.