Mirëqenia sipas qarqeve – Nga Tirana në Gjirokastër, diferenca të ndjeshme
Anketa e fundit e buxhetit të familjeve, e publikuar nga Instituti i Statistikave tregon jo vetëm një hendek të madh mes më të pasurve dhe pjesës tjetër të popullsisë, por edhe një hendek të madh mes qyteteve të ndryshme të Shqipërisë.
Qarku që shpenzon më shumë, është pa diskutim kryeqyteti, ku shpenzimi mesatar mujor për një familje fiksohet në 85 mijë lekë. Një vit më parë, konsumi mesatar për një familje në Tiranë fiksohej në 81 mijë lekë, duke e bërë kryeqytetin një prej qarqeve me rritjen më të madhe të konsumit.
Qarku i dytë pas Tiranës, për shpenzimet më të mëdha për konsum është Durrësi, me rreth 78 mijë lekë në muaj. Më pas ndjek Shkodra me 75 mijë lekë. Lezha ndërkohë, ka zbritur në vendin e katërt, nga vendi i dytë i vitit të mëparshëm, pasi konsumi për familje duket se është tkurrur në 75 mijë lekë, nga 79 mijë lekë të vitit të mëparshëm.
Në pas ndjek Fieri me 71 mijë lek, Kukësi me 68 mijë lekë, Korça me 67 mijë, Berati me 64 mijë lekë dhe Dibra me 63 mijë lek. Tre vendet e fundit, që sipas kësaj ankete rezultojnë edhe si qarqet me mirëqenien më të ulët në rang republike, janë vërtetë një surprizë, pasi bëhet fjalë për Vlorën, Elbasanin dhe Gjirokastrën, me nga 58 mijë, 57 dhe 57 mijë lekë respektivisht.
Pra, rezulton se, mesatarisht, një banor i qarkut të Tiranës konsumon mesatarisht në muaj 1.5 herë më shumë se një banor i Gjirokastrës, dhe një banor i qarkut të Lezhës, 1.3 herë më shumë se një i qarkut të Vlorës.
Tab.1 Konsumi mesatar mujor sipas qarqeve
Tiranë 85 mijë lekë
Durrës 78 mijë lekë
Shkodër 75 mijë lekë
Lezhë 75 mijë lekë
Tab.2 Konsumi mesatar mujor sipas qarqeve
Fier 71 mijë lekë
Kukës 68 mijë lekë
Korçë 67 mijë lekë
Berat 64 mijë lekë
Tab.3 Konsumi mesatar mujor sipas qarqeve
Vlorë 58 mijë lekë
Elbasan 57 mijë lekë
Gjirokastër 57 mijë lekë
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.