“Mirëserdhe në ferr D.Trump” – G20, mbi 100 mijë protestues shkaktojnë kaos në Hamburg
Situata në Hamburg është tensionuar së tepërmi. Janë më shumë se 100 mijë qytetarë që kanë dalë të protestojnë për samitin e 20 vendeve më të industrializuara të globit.
Përplasjet me policinë ndërkohë kanë rezultuar të dhunshme. Synimi kryesor i turmës është ai që t’i afrohen sa më shumë godinës ku do të takohen liderët e botës së zhvilluar. Vetëm ndër forcat e rendit raportohet për dhjetëra të plagosur.
Historikisht, samitet e G20 por edhe G7-ës kanë prodhuar përplasje të tilla. Por kësaj here, protestuesit kanë një motiv më shumë për të dalë nëpër rrugë: Donald Trump.
Presidenti amerikan nuk do të jetë vetëm nën kritikën e qindra mijëra qytetarëve, por edhe nën presionin e liderëve të botës, e kryesisht liderëve europianë.
Tregtia e lirë dhe pakti i sapo anuluar i ndryshimeve klimatike do të jenë temat e nxehta ku do të ketë përplasje edhe në nivel të lartë.
Protestat që kanë filluar që prej së Enjtes masivisht, kanë prodhuar kaos në rrugët e Hamburgut. Protestuesit kanë djegur dhe dëmtuar me qindra automjete.
“Mirëserdhe në ferr”, kjo është parrula e mikpritjes ndaj Donald Trump në Hamburg të Gjermanisë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.