“Mish-mashi” në regjistrat kadastrale, ekspertët e Bankës Botërore: Hartat e Kadastrës s’përputhen me realitetin në terren
Një raport i Bankës Botërore konkludon se hartat e pasurive të paluajtshme në Shqipëri në masë të madhe nuk përputhen me situatën në terren. Problemi që haset më shpesh është pozicioni gabim i ndërttimeve apo sipërfaqeve të tokës në raport me vendodhjen ne terren. Konkluzionet e ekspertëve të Bankës Botërore janë publikuar nga Avokati i Popullit në raportin mbi respektimin e së drejtës së pronës në Shqipëri. “Po kështu edhe përfaqësues të Bankës Botërore, pas inspektimit të drejtorive vendore të Agjencisë Shtetërore të Kadastrës, kanë konkluduar se: – Hartat ekzistuese kadastrale kanë një tendencë të lartë të mos jenë në përputhje me situatën në terren. Problematika që haset më shpesh është se njësitë e pasurive të paluajtshme (parcelat dhe ndërtesa) në shumë raste janë të pozicionuara gabimisht.
Më tej në raport theksohet se me kalimin e kohës për shkak të ndryshimeve në specifikime dhe referencë, problematika është rritur.
– Në shumë raste, kur ka kopje të ndryshme fletë harte, vihet në diskutim se cila hartë është aktuale apo e sakta.
– Në zyrat e ASHK-së të dhënat mbi parcelat nuk mungojnë por nuk dihet me saktësi statusi i pronës
– Situata është përgjithësisht më e ngatërruar në zonat urbane, sidomos në Tiranë dhe rreth saj si dhe në zonat bregdetare më të mëdha, ku ka shumë ndërtime informale.
“Gabimet më së shumti janë akumuluar për shkak të mospërputhjeve që vijnë edhe nga mungesa e dokumentacionit. – Gabimet në regjistrimet e pronave përgjithësisht reflektojnë kufij të gabuar, madhësinë e parcelës dhe dokumentacionin e pronësisë. – Gabimet zakonisht zbulohen në kohën kur bëhet një transaksion në njësinë përkatëse të pasurive të paluajtshme. Në kohën kur bëhet një transaksion, pronari i pronës ose pronarët ngjitur të pronave nuk kanë njohuri për gabimet mbi pasurinë”, thekson Avokati i Popullit duke cituar ekspertët e Bankës Botërore.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.