Misionet jashtë kufijve – Xhaçka: Rrisim prezencën tonë me 60% në Afganistan në vitin 2018
Shteti shqiptar do të rrisë me 60% prezencën ushtarake në Afganistan për vitin 2018. Lajmi është bërë publik nga Ministrja e Mbrojtjes, Olta Xhaçka, gjatë ceremonisë së pritjes së kontigjentit të 6-të që përfundoi misionin në Kabul dhe përcjelljes së kontigjentit të 3-të me mision në Herat, Afganistan. Ajo falenderoi ushtarakët për kontributin e dhënë përkrah aleatëve.
“Ky është një moment që na bën të ndihemi krenarë për arritjet tona, si dhe për kontributin, që ne si FA japim përkrahë aleatëve tanë për vendosjen e paqes, sigurisë dhe kthimit të normalitetit në një pikë shumë të nxehtë të globit. Ceremoni të tilla, të përcjelljes së kontingjenteve në misionet e radhës, mbartin në vetvete një konstante të vazhdueshme, atë të vlerës së shtruar, të rritjes së përvojës, të rritjes së profesionalizmit të trupave tanë në teatrin e operacioneve. Mbetemi të angazhuar për të vijuar kontributin duke rritur me 60% prezencën tonë në Afganistan për vitin 2018, duke iu përgjigjur kështu pozitivisht strategjisë së re të presidentit Trump mbi Afganistanin. Përfaqësimi në këto misione është shndërruar tashmë në simbolin e profesionalizmit dhe të përkushtimit të ushtarakëve tanë”, tha Xhaçka.
Në ceremoni morën pjesë ambasadori i Italisë Alberto Cutillo dhe zëvendësambasadori i Turqisë Sinan Cem Baş.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.