Mjekët nga Europa braktisin Mbretërinë e Bashkuar – Pas Brexit do të bëhet më keq

Një numër gjithmonë e më i madh mjekësh nga vendet e Bashkimit Europian janë duke zgjedhur të mos pranojnë një ofertë pune në Britaninë e Madhe. Doktorët që hynë në shtetin ishullor ra vitin e kaluar me 9%, duke prekur nivelin më të ulët të 9 viteve të fundit.

Të dhënat e Këshillit të Përgjithshëm Mjekësor të këtij vendi tregojnë se u regjistruan për punë vetëm 3,458 doktorë, duke shënuar një rënie prej 26% nga piku i vitit 2014, kur erdhën 4,644 doktorë.

“Nëse do të ndërtosh një të ardhme, duhet të mendohesh dy herë përpara se të pranosh një punë afatgjatë në Mbretërinë e Bashkuar”, shprehet një mjek francez.

Mjekët që kanë konsideruar një pozicion pune në këtë vend thonë se situata do të përkeqësohet pas vendimit për të dalë nga BE. Jo-britanikët nuk kanë marrë ende një përgjigje të qartë nëse do të mund të punojnë dhe jetojnë atje pas Brexit, pavarësisht përpjekjeve për t’i qetësuar nga qeveria e Theresa May.

Shifrat vijnë në një moment kur Shërbimi Kombëtar Shëndetësor po shihet si i lidhur me identitetin britanik. Kjo për shkak se gjatë fushatës para referendumit, pala pro daljes premtoi që 350 milionë paundë në javë do t’i kthehen shëndetësisë, në vend që të shkojnë si kuota për anëtarësimin në BE.

Gara për të tërhequr mjekë do të ndizet më tej në të gjithë botën. Vetëm në vitin 2020, BE do të ketë nevojë për 230 mijë mjekë më shumë nga sa janë të disponueshëm sot. Ndërkohë, mungesa për mjekë në botë llogaritet në rreth 2.6 milionë individë.

Por largimi nuk po prek vetëm doktorët. Shifrat janë në rënie të theksuar edhe për infermierët që vijnë në Britani. Shifrat e Shtatorit tregojnë se 10 mijë të punësuar nga BE, përfshirë infermierë, doktorë dhe staf tjetër, janë larguar tashmë nga puna. Këtë dimër, qeveria do të plotësojë mungesat duke vendosur më tepër studentë mjekësie në sallat e urgjencës.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.