Mjekët popullorë në “shënjestrën” e Kodit Penal
Ndryshimet më të fundit që po i bëhen Kodit Penal synojnë t’i japin zgjidhje disa prej problematikave të konstatuara si tregtimi i lëndëve narkotike apo shlyerja e dënimit përmes pagesës.
Por krahas këtyre ndryshimeve, në Kodin e ri Penal që është në proces diskutimi, është parashikuar vendosja nën kontroll e mjekësisë dhe e barnave alternative apo siç njihen ndryshe popullore. Në Kodin Penal ekzistues parashikohet vetëm dënimi me gjobë deri në 5 vite për mjekimin e pakujdesshëm, ndërsa tashmë janë shtuar 6 pika të tjera ku detajohet ndëshkimi për rastet e abuzimit me mjekësinë popullore.
Referuar projektit të përgatitur, “ushtrimi i mjekësisë alternative, pa autorizimin përkatës të autoriteteve shëndetësore, kur i ka shkaktuar një dëmtim të konsiderueshëm shëndetit të pacientit, dënohet me gjobë, heqje të së drejtës së ushtrimit të profesionit dhe me shpërblimin e dëmit të shkaktuar”.
Po ashtu, kryerja e trajtimit mjekësor ose trajtimit alternativ mjekësor, nga mjeku që nuk ka kualifikimet e duhura, duke shkaktuar vonesë në marrjen e ndihmës mjekësore në kohën e duhur për pacientin, dënohet me heqje të së drejtës se ushtrimit të profesionit dhe me shpërblimin e dëmit të shkaktuar.
E në rastet kur kjo vepër, kur ka shkaktuar dëm serioz për shëndetin e personit, dënohet me gjobë, heqje të së drejtës së ushtrimit të profesionit dhe me shpërblimin e dëmit të shkaktuar. Kur vepra ka sjellë si pasojë vdekjen, dënohet me burg nga dy deri në tetë vjet. Krahas këtyre parashikimeve, në ndryshimet e reja përcaktohen penalitete për rastet e përgatitjes ose tregtimit të barnave që nuk kanë në përbërje sasinë e kërkuar të një ilaçi, sipas standardeve të përcaktuara, ose lëshimi i një ilaçi apo substance tjetër nga ajo e përshkruar. Në këtë rast, dënohet me gjobë dhe heqjen e së drejtës së ushtrimit të profesionit.
Po në rastet kur kjo vepër, kur ka shkaktuar dëmtim të konsiderueshëm të shëndetit të një personi, atëhere ndëshkimi është me burg deri në gjashtë muaj, heqje të së drejtës së ushtrimit të profesionit dhe me shpërblimin e dëmit të shkaktuar. Kur vepra ka sjellë si pasojë vdekjen, dënohet me burg nga dy deri në tetë vjet.
(k.k)
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.