Mjekët tanë, më të keqpaguarit në Europë – Me pagën e tyre blejnë më pak se 20% të të mirave dhe shërbimeve që blen një koleg europian
Shqipëria ofron pagat më të ulta në Europë për mjekët dhe të gjithë profesionistët e kujdesit shëndetësor, sipas standardit të fuqisë blerëse (PPS). Ky njehësim eleminon efektin e kursit të këmbimit, pra diferencën e çmimeve, çka do të thotë se me një njësi PPS mund të blesh të njëjtin produkt në të gjitha vendet. Pra, me pagën e tyre, profesionistët e kujdesit shëndetësor në Shqipëri mund të blejnë më pak të mira apo shërbime se cilido shtet tjetër i Europës, si krahasuar me vendet e Bashkimit Europian, ashtu edhe krahasuar me vendet e ballkanit perëndimor.
Kosova nuk merret në analizë. Në këtë përfundim arrin raporti i publikuar së fundmi nga Instituti i Vienës për Studime Ekonomike Ndërkombëtare i cili analizon lëvizjen e profesionistëve të disiplinave të kujdesit shëndetësor nëpër Europë, sidomos valën e viteve të fundit, kryesisht nga vendet e rajonit. Në Shqipëri, ata që kujdesen për shëndetin e njerëzve paguhen më pak se 20% e asaj që paguhen të njëjtat profesione në 15 vendet më të zhvilluara të Bashkimit Europian.
Asnjë vend tjetër i Europës apo Ballkanit Perëndimor nuk ka një normë kaq të ulët sa vendi ynë dhe askush nuk zbret nën 20%. Pra, në linja më të përgjithshme, me pagën që merr në Shqipëri, një mjek dhe infermier shqiptar mund të blejnë diçka më shumë se 15% të asaj që blejnë kolegët e tyre, në Finlandë, dhe diçka më pak se 10% të asaj që blejnë kolegët e tyre në Luksemburg. Duket se kjo është edhe një prej arsyeve kryesore të valës së largimit të këtyre profesionistëve nga vendi ynë dhe i gjithë rajoni gjatë viteve të fundit.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.