Mnuchin mbi luftën tregtare – Sekretari i Thesarit tha se do të vizitojë kinën për të ulur tensionet
Sekretari i Thesarit në SHBA, Steven Mnuchin, tha se do të udhëtojë në Kinë për të lehtësuar tensionet tregtare mes dy ekonomive më të mëdha në botë, ndërkohë që politikëbërësit ndërkombëtarë kanë pranuar se Pekini duhet të ndryshojë praktikat tregtare.
Shtetet e Bashkuara kanë kërcënuar të vendosin tarifa në mbi 150 miliardë dollarë mallra kinezë të importit, në përpjekje për të detyruar Pekinin që të ndryshojë politikat.
Mnuchin tha se ka pasur në mënyrë të vazhdueshme bisedime me homologët kinezë, për të zgjidhur mospërputhjet mbi tregtinë, por shtoi se do të duhet të vizitojë së shpejti Pekinin.
Megjithatë, ai nuk dha detaje se çfarë synon ndaj një marrëveshjeje tregtare me Kinën. Ekonomia e dytë më e madhe në botë ka kërcënuar se do të kundërpërgjigjet ndaj Shteteve të Bashkuara, nëse administrata e Trump vendos tarifat.
Kreu i Fondit Monetar Ndërkombëtar, Christine Lagarde paralajmëroi këtë javë se lufta tregtare mes dy vendeve kërcënon besimin e investitorëve, investimet dhe rritjen ekonomike.
Nga ana tjetër, Ministria e Tregtisë në Kinë deklaroi se e mirëpret vizitën e Sekretarit amerikan të Thesarit, pasi u njoftua për lajmin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.