Modeklarimi i parave- Pas Muriqanit, rast tjetër në Rinas! Sekuestrohen 26 mijë euro
Policia Kufitare ka goditur një tjetër rast të mosdeklarimit të të hollave në kufi. Policia e Shtetit njofton se ka proceduar penalisht një 38 vjeçar të cilit i janë sekuestruar 26 mijë e 500 euro.
“Në kuadër të masave të përbashkëta të marra mes Policisë Kufitare dhe autoriteteve doganore për rritjen e masave në drejtim të forcimit të kontrollit me qëllim parandalimin, evidentimin dhe goditjen e paligjshmërisë, gjatë paradites së sotme është evidentuar dhe goditur një tjetër rast i transfertave të parave në mënyrë të paligjshme jashtë vendit.
Gjatë kontrollit në vijën e dytë të shtetasit J. S. 38 vjeç, i cili do të udhëtonte për jashtë vendit Policia Kufitare në bashkëpunim me doganën, i gjeti këtij shtetasi 26500 euro te padeklaruara në doganën e Rinasit, të cilat u sekuestruan në cilësinë e provës materiale” njofton Policia.
Në përfundim të veprimeve materialet do t’i kalojnë për veprime të mëtejshme Prokurorisë për veprën penale “Mosdeklarimi në kufi i të hollave dhe i sendeve me vlerë”.
Kjo është hera e dytë që sekuestrohen para të padeklaruara në pikat kufitare. Pak ditë më parë edhe në pikën kufitare të Muriqanit u sekuestruan 100 mijë euro të padeklaruara.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.