Modelet e makinave më të shitura në Europë – Automjetet janë mesatarisht 10,7 vite të vjetra

Volkswagen Golf është makina më e shitur në Europë. Shifrat tregojnë se makina shumë popullore edhe në vendin tonë shet mbi 500 mijë modele në vit, duke zënë 3,7% të tregut të makinave personale.

Ajo ndiqet nga Ford Fiesta, Renault Clio, VW Polo dhe Ford Focus. Ndërsa sa i përket modeleve të automjeteve të lehta të cilat përdoren për tregtim-transport, pra jo kamionët, Ford Transit zë pjesën më të konsiderueshme të tregut me 12,5%.

Në total, makinat personale zënë 89% të tregut europian prej 14 milionë automjetesh të shitura në vit, ndërsa 11% i mbetur shkon për automjetet tregtare, të cilat gjerësisht preferohen furgona.

Në Europë është Luksemburgu shteti me më shumë makina të reja të regjistruara për 1000 banorë, 88, dhe është gjithashtu vendi i dytë me më shumë makina për 1000 banorë me 745. Vetëm Malta e tejkalon këtë raport, me 775 makina për 1000 banorë, ndërsa treshen e mbyll Italia me 706 automjete për 1000 banorë.

Sa i takon vjetërsisë së automjeteve, drejtuesit në Luksemburg ngasin automjete personale mesatarisht 6,2 vite të vjetra; ndjekur nga Belgjika me një vjetërsi mesatare prej 7,7 vjetësh. Mesatarja e Bashkimit Europian është 10,7 vjet për automjetet personale, 10,7 vjet për makinat e lehta tregtare dhe 11,7 vjet për automjetet e rënda tregtare.

Vendet e Europës lindore janë ato që ngasin automjete më të vjetra: makinat në Poloni janë mesatarisht 17,2 vjeçare, ndërsa automjetet e rënda tregtare në Greqi kanë mesataren më të keqe në rajon me një vjetërsi mesatare 18,7 vjeçare, e ndikuar edhe nga kriza e thellë ekonomike.

Kriza ka ndikuar përgjithësisht në vjetërsinë e automjeteve në të gjithë Europën, ku vitet e përdorimit janë rritur në mënyrë konstante nga viti 2007, kur mosha mesatare e automjetit ishte 8,4 vjet.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.