Mogherini bën “kumbaren” – “2019 është viti për Shqipërinë, nuk po bëjmë bamirësi”
Përfaqësuesja e lartë e Bashkimit Europian për politikën e jashtme dhe çështjet e sigurisë, Federica Mogehrini ka folur qartë në konferencën vjetore të ambasadorëve të unionit. Ajo ka kërkuar integrimin e Shqipërisë dhe Maqedonisë në Bashkimin Europian, duke thënë se ky është viti i së vërtetës. “Ky do të jetë një vit intensiv në procesin e përgatitjes drejt hapjes së negociatave për anëtarësimin me Shqipërinë dhe Republikën e Maqedonisë së Veriut”– deklaroi Mogherini.
“Më lejoni ta them këtë qartë; këto mundësi duhen marrë tani, ky vit është viti. Ky nuk është një lëshim që ne bëjmë, por është në interesin e të gjithë qytetarëve europianë, si brenda ashtu edhe jashtë Bashkimit Europian. Në Ballkan sot është e qartë se Bashkimi Europian është pika e referencës. Lejomëni t`iu them edhe atyre që kanë frikë se fuqi të tjera po bëhen më të pranishme në rajon; aty ku ne jemi të pranishëm, nuk ka hapësira për të tjerë”-nënvizoi Federica Mogherini.
Veç të tjerash, Mogherini ka folur edhe për të ardhmen e Bashkimit Europian, duke i`u kërkuar vendeve anëtare të mos fokusohen shumë te fakti që 2019 do të jetë një vit elektoral për Brukselin.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.