Mogherini: Gabim historik! – Progres i jashtëzakonshëm nga Shqipëria dhe Maqedonia e Veriut

Një `gabim historik` e ka cilësuar përfaqësuesja e lartë e Bashkimit Europian, Federica Mogherini, vendimin i Këshillit Europian për të mos hapur negociatat për anëtarësim me Shqipërinë dhe Maqedoninë e Veriut.

“Po shkruaj pas mbledhjes së vështirë të Këshillit Europian; krerët e shteteve dhe qeverive shtynë vendimin për hapjen e negociatave për Shqipërinë dhe Maqedoninë e Veriut, pavarësisht progresit të jashtëzakonshëm të arritur nga të dyja shtetet si dhe kundër këshillës së Komisionit Europian.

Është më shumë se një shans i humbur: është një gabim historik, i cili shpresoj të korrigjohet sa më shpejtë të jetë e mundur”, shkruan Federcia Mogherini në lidhje me këtë çështje, duke zgjedhur ta trajtojë të parën ndër të tjera, si ajo e Brexit, Sirisë, etj. Për këtë çështje ka reaguar edhe Ministri Gjerman i Ekonomisë, Peter Altmaier.

“Jam i zhgënjyer për rezultatet e samitit. Është në interesin tonë që të lidhim Maqedoninë e Veriut dhe Shqipërinë me Bashkimin Europian si dhe të njohim përpjekjet e tyre të mëdha për demokraci dhe stabilitet, dhe se bisedimet për anëtarësim duhet të nisin sa më shpejt”-deklaroi politikani i CDU-së, njëkohësisht anëtar i kabinetit qeveritar në një intervistë për të përditshmen `Bild`.

Një ditë më parë ndërkohë, grupimi parlamentar i CDU/CSU deklaronte se, dy shtetet duhet ët vazhdojnë përpara dhe ta marrin këtë vendim si një nxitje për të vazhduar me reformat, pasi Franca nuk do të mund ta bllokojë për të dytën herë anëtarësimin, sidomos në rast se do të ketë progrese të mëdha nga të dy vendet.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.