“Moody`s” mbështet BSH – “Lufta ndaj euroizimit do të rrisë stabilitetin financiar, do ndihmojë bankat”

Në raportin e fundit periodik për vendin, të siguruar ekskluzivisht nga Scan, agjencia e vlerësimit të kreditit Moody`s ka mbajtur të pandryshuar vlerësimin për Shqipërinë në  B1 me perspektivë të qendrueshme. Në raportin e ri për vendin tonë, për herë të parë, Moody`s flet edhe për fenomenin e euroizimit duke dalë haptazi në mbështetje të Bankës së Shqipërisë dhe politikave më të fundit të prezantuara nga institucioni për të luftuar fenomenin.

Moody`s nënvizon faktin se lufta ndaj përdorimit të gjerë të euros në ekonominë shqiptare do të ulë rreziqet ndaj stabilitetit financiar që është një ndër kriteret kyç të profilit të kreditit. Varësia që ka ekonomia nga monedha e përbashkët ka ndikim si në rritjen e kreditimit, ashtu edhe në shëndetin e ekonomisë shqiptare në tërësi, vijon më tej agjencia.

Por, nga ana tjetër, shton agjencia, kjo politikë e re e Bankës së Shqipërisë do të ndihmonte dhe bankat që operojnë në vend, nëpërmjet nxitjes së uljes së kredive me probleme. Sa i përket projeksioneve për ecurinë ekonomike, ato flasin për 3.9% rritje këtë vit dhe 4% vitin e ardhshëm, duke bërë që agjencia të jetë një ndër të paktat që vlerëson se vitin e ardhshëm do të ketë përshpejtim të ekonomisë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.