Moody`s projekton kursin – Dollari nuk do të bjerë më kundrejt lekut, do rimëkëmbet lehtë
Paçka se gjatë kohëve të fundit dy valutat kryesore të përdoruara në vendin tonë, euro dhe dollari, janë vërejtur në një trend rënës, duket se e ardhmja nuk do të jetë pikërisht kështu, të paktën sa i përket dollarit amerikan.
Agjencia e vlerësimit të kreditit, Moody’s në raportin më të fundit për vendin tonë, të siguruar nga “Scan”, vëren se, gjatë këtij viti, dollari amerikan do të blihet mesatarisht me 108.76 lekë, çka do të thotë se, aktualisht, dollari me lekun këmbehen nën mesataren vjetore të projektuar nga gjigandi i vlerësimeve, edhe më shpresëdhënës duket se është situata për vitin e ardhshëm, ku mesatarja e këmbimit projektohet në 109.53 lekë.
Pra, Moody’s, paçka se nuk flet për një rimëkëmbje të monedhës amerikane, duket se jep deri diku garanci se nuk do të ketë një zhvlerësim të papritur.
Gjithsesi, këto mbeten në kuadrin e projeksioneve, edhe pse vijnë nga një prej agjencive më prestigjioze dhe më të specializuara në botë. Kursi i këmbimit ka shpeshherë ecuri të papritura dhe jo rrallëherë edhe një mungesë të logjikës së pastër ekonomike apo financiare.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.