Moody’s ruan vlerësimin e SHBA – Në “Aaa”, fuqizimi ekonomik do kompensojë performancën fiskale

Agjencia Moody’s, ka mbajtur vlerësimin e kreditit për Shtetet e Bashkuara në  “Aaa”, më i larti i mundshëm, duke shtuar se fuqizimi i ekonomisë do të balancojë performancën e dobët fiskale.  Agjencia mbajti gjithashtu perspektivën në të qëndrueshme dhe shtoi se Washingtoni pritet të zgjidhë konfliktin e fundit tregtar me Kinën.

Reduktimet e mëdha tatimore të kaluara gjatë Dhjetorit,  për të cilat republikanët kanë thënë se do të vetëfinancohen, pritet të “fryjnë” deficitin e Shteteve të Bashkuara në vitet e ardhshme, sipas mbikëqyrësit të buxhetit në Kongres.  Ndërkohë, Moody’s bëri të ditur se deficitet buxhetore federale të SHBA do të rriten në afat-mesëm, por ekonomia e fortë e vendit do të kompensojnë për performancën fiskale.

“Diversiteti, dinamika dhe konkurrueshmëria e ekonomisë amerikane, së bashkë me statusin e dollarit si valutë e rezervave ndërkombëtare dhe madhësinë e tregut të Thesarit, pritet të kompensojnë për rritjen e presioneve fiskale”, deklaroi Moody’s. Agjencia ka monitoruar edhe konfliktin e fundit me Kinën, por bëri të ditur se nuk pret që tarifat e lajmëruara të zbatohen plotësisht.  Standard & Poor’s është e vetmja nga 3 agjencitë kryesore që nuk ka vlerësimin më të lartë për ekonominë më të madhe në botë. Në vitin 2011, S&P i hoqi vlerësimin prej AAA Shteteve të Bashkuara,  prej debatit të lidhur me limitin e borxhit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.