Morgan Stanley kundër Soros – Kreu i bankës hedh poshtë paralajmërimet e tij për një krizë financiare
Kreu ekzekutiv i Morgan Stanley, një prej bankave më të mëdha në Shtetet e Bashkuara, tha se parashikimi i George Soros për një tjetër krizë globale financiare nuk është realist.
“Mendoj se është qesharake. Nuk mendojë se po përballemi me një krizë të ekzistencës”, tha James Gorman në përgjigje të komenteve të Soros, ku dha gjithashtu një paralajmërim të shpërbërjes së Bashkimit Europian.
Investitorët duhet të shohin përtej trazirave që kanë ndodhur gjatë kohëve të fundit, tha ai, ndërkohë që shqetësimet e Italisë sollën luhatje edhe në tregun e borxhit të Shteteve të Bashkuara.
Sipas kreut të Morgan Stanley, yield-i 10-vjeçar i qeverisë amerikane pritet të vazhdojë rritje, së bashku me dollarin amerikan. Interesat e borxhit amerikan pritet të rriten ndërkohë që Rezerva Federale vazhdon kursin e normalizimit të politikave.
Sipas kreut të Morgan Stanley, Rezerva Federale do të rrisë normën bazë të interesit 4 herë këtë vit, ndërkohë që 1 rritje është ndërmarrë dhe një tjetër pritet në Qershor. Sipas tij, edhe dollari amerikan pritet të rritet me kalimin e kohës, ndërkohë që yield-i i titujve të thesarit fuqizohet.
Kreu ekzekutiv tha se sfidat në Itali janë pjesë e një strukture më të gjerë politike, që është vëzhguar në pjesën më të madhe të botës, përfshirë Britaninë. Megjithatë, ai shtoi se nuk do të përbëjë rrezik për Eurozonën.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.