“Mos ndryshoni kushtet e kontratave pas tenderëve” – Udhëzimi i APP për institucionet shtetërore: Duhet të përputhen me ofertën fituese
Institucionet shtetërore nuk mund të ndryshojnë kushtet e kontratave nga ato të përshkruara në dokumentet e tenderit dhe në ofertën fituese. Gjithçka parashikohet në një udhëzim të Agjencisë së Prokurimit Publik, që kërkon hartimin e planit të zbatimit të kontratës pas çdo tenderi të realizuar për punë, mallra apo shërbime. Udhëzimi bazohet në ligjin e ri “Për prokurimin publik”, ndërkohë që nuk kanë munguar rastet kur autoritetet kontraktore kanë parashikuar të tjera kushte në kontratë, nga ato të parashikuara në garat tenderuese.
Ndërkaq, sipas udhëzimit përjashtime në këtë drejtim mund të bëhen vetëm në rastet kur kompanitë fituese, me të njëjtin çmim ofrojnë kushte më të mira se ato të tenderuara. Sa i takon planit të zbatimit të kontartës, ai do të përfshijë çështjet organizative, afatet e përcaktuara, çështjet ekonomike, kushtet specifike teknike apo personat përgjegjës për ndjekjen e zbatimit të kontratës. Udhëzimi jep edhe shpjegime kontrete për hartimin e planit, sipas llojit të kontratave për punë, mallra apo shërbime.
Gjithashtu, në dokument thuhet se duhet të parashikohen edhe afatet e parashikuara për administrimin e kërkesave për ndryshime, modifikime apo përshtatje të zbatimit të kontratës dhe miratimin nga strukturat përkatëse, brenda afatit të përcaktuar në kushtet e tenderit. Referuar ligjit të ri, për herë të parë u parashikua koncepti i modifikimit të kontratave gjatë zbatimit të tyre deri në vlerën 20%, sikurse parashikohet në Direktivat e Bashkimit Evropian.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.