“Mos rrëmbeni Brexit” – Fox paralajmëron deputetët që kërkojnë të marrin kontrollin
Parlamenti nuk duhet të lejohet që të “rrëmbejë” Brexit, sipas Ministrit të Tregtisë, Liam Fox, që paralajmëroi deputetët që kërkojnë të marrin kontrollin e daljes së Britanisë nga Bashkimi Europian. Ndërkohë që pak javë kanë mbetur nga afati i daljes së Britanisë, Kryeministrja Theresa May do të rikthehet në parlament këtë javë për të prezantuar mënyrën se si ajo kërkon të kalojë ngërçin e Brexit.
Koha për Brexit po mbaron, që është ndryshimi më i madh i politikave të jashtme dhe tregtare të Britanisë në më shumë se 40 vite, por deri më tani nuk është bërë progres i madh për të bashkuar parlamentin britanik. Opozita në Britani me në krye Jeremy Corbyn, po kërkon zgjedhje të reja, ndërsa anëtarë të tjerë të parlamentit po bëjnë thirrje për një referendum të dytë.
Fox, një mbështetës i Brexit, tha për BBC se marrëveshja e divorcit e Theresa May, ishte ende alternativa më e mirë e mundshme. Ai paralajmëroi politikëbërësit që të mos përpiqen të marrin në kontroll daljen e Britanisë. “Parlamenti nuk ka të drejtën që të rrëmbejë procesin e Brexit, për shkak se parlamenti i ka premtuar popullit britanik se do të jenë ata që do të marrin vendimin”, tha Fox.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.