Moscovici i bën thirrje Francës – Të respektojë “Paktin e Stabilitetit dhe Rritjes” sa më shpejt
Komisioneri Europian për çështjet ekonomike dhe financiare, Pierre Moscovici, tha se Franca duhet të ulë deficitin poshtë tavanit të Bashkimit Europian këtë vit prej 3% në raport me Produktin e Brendshëm Bruto, për të rikthyer besueshmërinë ndaj vendit.
Moscovici i bëri thirrje Macron, i cili është inkurajuar nga fitorja e partisë së tij të re në zgjedhjet parlamentare, që të fillojë me reformat e premtuara mbi ekonominë. “Franca duhet të rikthejë besueshmërinë duke ndërmarrë reformat në tregun e punës dhe për buxhetin”, tha Moscovici.
Macron fitoi zgjedhjet presidenciale në Maj duke premtuar se do të nxisë ekonominë duke riorganizuar rregulloret. Ndërsa presidenti pro-Bashkimit Europian është mirëpritur nga Brukseli dhe Gjermania, disa politikëbërës e kanë paralajmëruar kundër lehtësimeve fiskale.
Banka Qendrore e Francës deklaroi javën e kaluar se deficiti i buxhetit do të rezultojë 3.1% këtë vit, sipër kufirit të Bashkimit Europian prej 3% dhe sipër projeksioneve të Qeverisë Socialiste prej 2.8%. “I bëj thirrje presidentit që të respektojë paktin për rritjen dhe stabilitetin brenda këtij viti. Buxheti I Francës nuk duhet të kalojë 3%”, tha Moscovici.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.