Mosdhënia në kohë e të drejtës së qytetarit, Rama: Rreth 300 punonjës janë larguar nga puna

Rreth 300 punonjës të administratës janë larguar nga puna pasi kanë zvarritur zgjidhjen e problemeve të qytetarëve.

Në takimin e përjavshëm me koordinatorët e bashkëqeverisjes, kryeministri Edi Rama deklaroi se deri më tani janë marrë 643 masa ndëshkimore, ndërsa pjesa më e madhe e ankesave nga fillimi i platformës lidhen me nivelin qendror të qeverisjes.

“Në total nga momenti i funksionimit të plotë të platformës shqipëriaqëduam.al janë regjistruar 33 mijë e 336 çështje, kërkesa, ankesa apo adresime të llojeve të tjera. Çështjet lidhen me nivelin qëndron të qeverisjes dhe me nivelin vendor. Ne nivelin qendror kemi pasur 28 mijë 565 çështje dhe konkretisht ankesa, nga të cilat janë trajtuar 27 mijë e 335 raste. Pra ajo diferenca e vogël është e lidhur me ankesat dhe çështjet në vazhdim. Janë 643 masa ndëshkimore nga hetimet administrative pasi qytetarët kanë fituar të drejtën e tyre, dhe pothuajse gjysma e këtyre masave janë largime nga puna. Pra janë afro 300 të larguar nga puna si rezultat i hetimit për mosdhënien në kohë të së drejtës së qytetarit”.

Rama u ndal edhe të rubrika kushtuar studentëve. Ai tha se mungesa e dokumentacioneve ka çuar në shtyrje të afatit për disbursimin e fondeve. Po ashtu kreu i qeverisë tha që do të ketë edhe një shtyrje të afatit për aplikuesit e platformës së punësimit.

“Po ashtu së fundmi në platformë është vendosur rubrika “Jam student, kam një pyetje”. Lidhur me ke transformim që sapo ka nisur mes qeverisë dhe universitetit dhe të mbështetjes horizontale që do ti japim universitetit ka një problem të vetëm që për të disbursuar të gjitha fondet në drejtim të universiteteve. Ne kemi nevojë për lista të sakta të studentëve, lidhur me statusin e tyre, situatën e tyre sociale-ekonomike, dhe kjo ka marrë pak kohë për sekretariatet e universiteteve, ne kemi kërkuar edhe një shtyrje të afatit ashtu sikundër do bëjmë edhe një shtyrje të afatit për platformën e punësimit, pasi shumë studentët me 9-10 që duan të aplikojnë për tu punësuar drejtpërdrejtë në administratën publike e kanë pasur të pamundur për të marrë dokumentacionin e nevojshëm për aplikim. Kështu që do të bëjmë një shtyrje të afatit, për të pasur të gjithë mundësinë të aplikojnë në grupin e parë të vendeve të punës, që janë shpallur, që janë afro 800 vende pune në administratën publike me mastër dhe bachelor për ata që kanë mbarur vjet me 9-10 dhe për ta që do të mbarojnë sivjet do të ketë përsëri shpallje të tjera të vendeve të lira të punës”.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.