Moti i keq përfshin vendin, IGJEUM: “Rrezikshmëri e lartë për përmbytje në disa qarqe të vendit”
Instituti i Gjeoshkencave, Enegjisë, Ujit e Mjedisit parashikon rrezikshmëri të lartë të përmbytjeve apo fenomeneve të pazakonshme hidor-meteorologjike mjaft intensive në disa qarqe të vendit, ndërkohë që në në disa të tjerë rreziku parashikohet i moderuar. Sipas llogaritjeve të IGJEUM, deri në 11 Janar priten reshje shumë intensive, pothuajse në të gjithë territorin. Këto reshje do të sjellin rritje të rrezikshme të prurjeve në lumenjtë e mëdhenj dhe të mesëm Drin-Buna, Mat, Ishëm, Erzen, Shkumbin, Seman dhe Vjosë.
Përmbytje mund të shkaktohen nga lumi Drin-Buna dhe Liqeni i Shkodrës me prurjet maksimale të cilat parashikohen të arrijnë zonat e rrezikuara në datën 12 Janar 2021. Gjithashtu, lumenjtë Mat, Ishëm, Erzen dhe Shkumbin do i arrijnë prurjet maksimale në fundin e datës 8 dhe 9 Janar 2021. Lumenjtë Seman dhe Vjosa parashikohen të rrezikshëm, por me probleme më të vogla lokale të përmbytjeve. Shkalla e rrezikut nga përmbytjet lumore do varet edhe nga sasia e shkrirjes së dëborës, si pasojë e rritjes së temperaturave.
Përmbytje urbane dhe rrëshqitje të dherave mund të ndodhin gjithashtu në pothuajse të gjitha qarqet. Për datat 7- 8 janar parashikohen reshje shumë intensive në Qarkun e Shkodrës, Kukësit, Lezhës, Dibrëës, Vlorës e Gjirokastrës, ku sipas IGJEUM sasia e reshjeve të shiut do të kenë një intesitet më të madh se 90 mm/24 orë.
Ndërkaq, reshje intensive parashikohen në Qarqet e Tiranës, Durrësit dhe Elbasanit, ku intesiteti parashikohet në 45-90 mm/24. Për këto qarqe sipas Institutit të Gjeoshkencave moti parashikohet i rrezikshëm, çka do të sjellë fenomenet të pazakonta hidro-meteorologjike. Më i ulët mbetet rreziku në qarqet e Fierit, Beratit dhe Korçës, ndonëse mundësia që të shfaqen fenomene hidor-meteorologjike problematike është prezente. Ndërkaq, Autoriteti Rrugor Shqiptar ka apeluar drejtuesit e mjeteve të jenë të kujdesshëm për shkak të lagështisë në rrugë, teksa nuk raporton akse të bllokuar, si pasojë e borës apo rrëshqitjeve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.