Moti pengon fluturimet, të gjitha me vonesë ose të anuluara – AAC: Kontaktoni linjat ajrore
Moti i keq që ka përfshirë Europën kontinentale, ka shkaktuar çrregullime të orareve të fluturimeve nga Aeroporti Ndërkombëtar “Nënë Tereza” për disa fluturime në drejtim të aeroporteve të veriut të Italisë dhe Evropës qendrore.
Autoriteti i Aviacionit Civil u bën thirrje në këtë mënyrë qytetarëve që kanë rezervuar një biletë për të fluturuar sot dhe nesër, pra 27 dhe 28 shkurt, të kontaktojnë linjën ajrore përkatëse për të konfirmuar statusin e fluturimit të tyre.
Sipas të dhënave të aeroportit të Rinasit, të gjitha fluturimet deri më tani kanë patur vonesa ose janë anuluar. Fluturimi i orës 7:30 drejt Anconas është anuluar, ndërsa ato drejt aeroporteve të tjera janë nisur me vonesë nga disa minuta deri në 1 orë.
Situata paraqitet e njëjtë edhe në hyrje, teksa vonesat e fluturimeve variojnë nga 15-60 minuta, ndërsa një fluturim nga Ancona është anuluar.
Për të gjithë qytetarët që mund të mos zhvillojnë fluturimin e tyre për shkak të motit të keq në aeroportet Evropiane, AAC u bën thirrje që të rrinë të qetë, të kontaktojnë me kompaninë ajrore përkatëse dhe të kërkojnë mundësinë e marrjes së një fluturimi të mëvonshëm.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.