Mugabe, presidenti 93 vjeçar që garon sërish në 2018

Në një intervistë me rastin e 93 vjetorit të lindjes, presidenti i Zimbabwe, Robert Mugabe, ka konfirmuar synimin për të rikanduar edhe në zgjedhjet e ardhshme që mbahen në vitin 2018. Mugabe është në krye të vendit që prej viteve ‘80.

Gjatë intervistës, Mugabe ka konfirmuar sërish mbështetjen për bashkëshorten e tij që gjithashtu është shumë e angazhuar politikisht e që mban njëkohësisht edhe pozita të larta partiake. Grace Mugabe ka mbrojtur bashkëshortin e saj nga kritikat duke u shprehur se nëse ai do të vdiste para zgjedhjeve politike të vitit të ardhshëm, partia gjithsesi duhej t’i kandidonte trupin.

Robert Gabriel Mugabe ka lindur me 21 shkurt të vitit 1924.

Ai është një revolucionar e politikan që drejton Republikën e Zimbabwe që prej viteve ’80 fillimisht si kryeministër e më pas si president. I lindur në një familje të varfër, ai arriti të arsimohet e të punojë fillimisht si mësues për t’u angazhuar më pas me forcat marksiste të Afrikës në betejën për shpalljen e Pavarësisë së vendit.

Në vitet ’60 ai u burgos për shkak të përfshirjes në protesta për t’u dënuar me 10 vite burg. Pasi u lirua në vitin 1974 ai shkoi në Mozambik ku u vu në krye të  Unionit Kombëtar të Zimbabwe-së. Në këtë mënyrë, ai u përfshi në negociatat për Pavarësisë e vendit duke fituar popullaritet që më pas në vitin 1980 do t’i sillte edhe fitoren në zgjedhjet e përgjithshme e marrjen e postit të kryeministrit. Në këtë moment nis edhe rruga e tij e gjatë e pushtetit.

Dominimi politik i Zimbabwes për thuajse 4 dekada e ka kthyer atë në një figurë përçarëse e kontroverse.

Disa e konsiderojnë një hero të përpjekjes çliruese të vendit, që kontribuoi për çlirimin nga kolonializmi britanik, imperializmi dhe qeverisja e pakicës së bardhë. Disa të tjerë e kritikojnë duke e cilësuar si diktator që është përgjegjës për keqmanaxhimin dhe përhapjen e korrupsionit, krime kundër njerëzimit  abuzim me të drejtat e njeriut.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.