“Mund ta përballojmë pensionin”! Zvicër, 80% e personave thonë se mund të ruajnë të njëjtin nivel jetese si në kohën kur punonin

Një studim i ri i “Suiss Life” ka dalë në një përfundim shumë optimist për sa i përket të moshuarve në Zvicër: 80% e personave në moshë pensioni shprehen se mund të ruajnë të njëjtën situatë financiare si në kohën e punësimit dhe madje e konsiderojnë gjendjen e tyre ekonomike më të mirë se pjesa tjetër e popullsisë.

Pavarësisht reduktimit të të ardhurave mujore pas daljes në pension, personat në moshën 65 – 74 vjec shpenzojnë pothuajse aq sa ata të moshës 50 – 61 vjec.

73% e personave mbi 65 vjec jetojnë në një ekonomi shtëpiake të kënaqshme madje e konsideruar e lartë ose shumë e lartë. Ndërsa për personat nën 65 vjec përqindja zbret në 58%.

Dy të tretat e pensionistëve të intervistuar deklarojnë se mund t’i lejojnë vetes të njëjtin nivel jetese si para pensionit. Ata që janë të detyruar të reduktojnë shpenzimet kryesisht kursejnë tek udhëtimet, restorantet dhe veshjet.

Dhe pse kuota e kursimit reduktohet në mënyrë domethënëse në fazën e pensionit, pjesa më e madhe e personave mbi 65 vjec jetojnë në ekonomi shtëpiake që grumbullojnë pasuri në vend që të shpenzojnë

1/5 e personave mbi 65 vjec arrin me shumë vështirësi në fund të muajit. Studimi thekson se popullsia dhe pse kërkon një reformë për sa i përket të moshuarve, kujdesit ndaj tyre dhe pensionet, nuk e ka idenë se si duhet të ndodhë ky proces. Aktualisht në vend ka më shumë pensionistë që vazhdojnë të kursejnë në krahasim me ata që konsumojnë pasurinë e tyre.

Gjysma e pensionistëve në vend kanë pasuri të paluajtshme me një vlerë prej 300 mijë frangash zvicerane, rreth 295 mijë euro.

Studimi në fjalë mbështetet në një vlerësim sistematik të të dhënave për të ardhurat dhe kushtet e jetesës, por dhe tek të dhënat për buxhetin e ekonomive shtëpiake që mblidhen nga zyra federale e statistikave.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.